BUU-nyń Áielderge qatysty kemsitýshilikti joiý jónindegi komiteti (CEDAW) Qazaqstandy turmystyq zorlyq-zombylyq úshin Qylmystyq kodekske jeke norma engizýge shaqyrdy. Bul týraly Human Rights Watch halyqaralyq quqyq qorǵaý uiymy málimdedi, dep habarlaidy dalanews.kz.
Human Rights Watch málimetinshe, 6 qazanda BUU komitetinde Qazaqstannyń baiandamasy qaralǵan. Jiyn barysynda qazaqstandyq delegatsiia biliktiń tiisti zańnamalyq ózgeristerdi qabyldaýǵa daiyn ekenin jetkizgen.
Qazirgi ýaqytta Qazaqstanda turmystyq zorlyq-zombylyqqa arnalǵan jeke zań joq. Buǵan deiin qoldanysta bolǵan 2009 jylǵy «Turmystyq zorlyq-zombylyq profilaktikasy týraly» zańnyń kúshi joiylǵan. Al biyl naýryz aiynan bastap qoldanysqa engen «Quqyq buzýshylyq profilaktikasy týraly» jańa zańda turmystyq zorlyq-zombylyqtyń aldyn alý máselesi jalpy profilaktika júiesi aiasynda qarastyrylady.
Qazaqstan delegatsiiasy BUU komitetine zorlyq-zombylyqqa múldem tózbeý qaǵidaty eldegi reformalardyń negizgi baǵyttarynyń birine ainalǵanyn málimdegen. Sondai-aq 2024 jyly turmystyq zorlyq-zombylyq úshin jaýapkershilik kúsheitilgenin atap ótken.
Alaida uiym ókilderi qoldanystaǵy sharalar jetkiliksiz dep esepteidi.
Uiym Qazaqstandy turmystyq zorlyq-zombylyqty Qylmystyq kodekste jeke qylmys retinde bekitýge, sondai-aq zardap shekken azamattardy qorǵaý tetikterin kúsheitýge shaqyrdy.
Atap aitqanda, quqyq qorǵaýshylar qorǵaý nusqamalarynyń tiimdiligin arttyrý, kinálilerdi jaýapqa tartýdy qamtamasyz etý jáne zorlyq-zombylyqtan zardap shekkenderdiń sot tóreligi men qajetti kómekke qol jetkizýine jaǵdai jasaý qajet ekenin atap ótti.
