Nensı Pelosı AQSH bılik ırerhıasynda Djo Baıden men Kamala Harrısten keıingi úshinshi adam. Ol kúni keshe Taıvanǵa sapar shegip, Qytaıdyń qytyǵyna tıgeni belgili.
Qytaı bıliginiń júıkesine tıip, Tramptyń baıandamasyn tikeleı efırde jyrtyp tastaǵan áıgili Pelosı hanymdy jurttyń bári biledi. Sol kisiniń zaıyby mas kúıinde kólik júrgizip, basy daýǵa qaldy.
Tártip saqshylar «Pelosıdiń kúıeýi bolsańyz qaıtemiz, zań bárimizge ortaq» dep aıyppul salyp, abaqtyǵa qamap tastapty. Álemdi dúr silkindirgen Nensı Pelosı dym isteı almaǵan.
Al bizdiń elde «Jumabektiń bajasy» ishpeı-jemeı joldy qarsy betine shyǵyp, kólik júrgizetini belgili. Aıtpaqshy, «Jumabektiń bajasy» qandaı jazamen qutylǵanyn bilmeımiz. Áıteýir áleýmettik jelide halyqtan keshirim surap, qarasyn batyrǵanyn bilemiz. Ókinishke oraı, ázirshe bizde jazanyń aýyr túri osy bolyp tur.
Aıtpaqshy, Pelosıdiń kúıeýi qandaı jaza tartylǵanyn bilesiz be? Mas kúıinde kólik júrgizgen «Pelosıdiń kúıeýi» 5 kún temir torǵa qamalatyn boldy. Eger osy 5 kúnde ózin durys ustamaı daý shyǵaratyn bolsa, qamaý merzimi taǵy da sozylýy bek múmkin.
«Pelosıdiń kúıeýi» temirtordan shyqqannan keıin 3 jyl boıy tártip saqshylarynyń baqylaýynda bolady. Osy aralyqta úsh aı boıy júrgizýshilerdiń kýrsynan ótýi tıis. Budan sátti ókennen keıin Pelosıdiń kúıeýiniń kóligine tártip saqshylary alkozamok qurylǵyna ornatyp qoımaqshy. Bul – qurylǵy «Pelosıdiń kúıeýi» ishimdik iship rúlge otyrsa, qurylǵy kóliktiń motoryn birden buǵattap, tártip saqshylaryna habar beredi eken. Al odan keıin «Pelosıdiń kúıeýin» qandaı jaza kútip turǵannyń elestetýdiń ózi qıyn.
AQSH-tyń ádil soty osyndaı jazalardy taǵaıyndaı kele, «Pelosıdiń kúıeýine» mas kúıinde kólik júrgizgeni úshin 7 myń dollar aıyppul saldy. Muny Jumabektiń bajasy estise tóbe shashy tik turartyny anyq.
Mine solaı. AQSH zańy seniń qyzmetiń men kimniń kúıeýi ekenine qarap, keńshilik jasamaıdy.
