Oblys ákimi 2020 jylǵy sanaqtyń sońyna deıin bul másele qarastyrylmaıtynyn taǵy da eske saldy.
"Qala ataýyn ózgertý máselesi kún tártibinde turǵan joq. Tek ataýdy ózgertý arqyly barlyq másele birden sheshimin tapsa ǵoı...
Bul jerde aqsha jumsaý, belgilerdi ózgertý, barlyq qujattama máseleleri bar. Ol bızneske de, memlekettik organdar úshin de aýqymdy jumys bolmaq.
Bul máseleniń tek bir jaǵy ǵana", - dep atap ótti Sqaqov tilshilermen kezdesý barysynda.
"Iá, árıne, bul qalanyń tarıhı mádenıetimen, paıda bolýymen jáne qalyptasýymen baılanysty basqa da nárseler bar. Biraq, meniń oıymsha, bul máseleni birinshi kezekke qoıýdyń esh qajeti joq", - degen oblys basshysy odan góri kúsh-jigerdi óńirdegi basqa máselelerdi sheshýge jumsaý kerektigin alǵa tartty.
Aıta ketsek, qaladaǵy birneshe bastamashyl top jáne qoǵamdyq birlestik ókilderi, aqsaqaldar Pavlodar ataýyn Saryarqa nemese Ertis dep ózgertýdi usynǵan edi.
Sońǵy ataýdy májilis depýtaty Aızada Qurmanova qoldap otyr. 2019 jyly qalany Kenesary hannyń atymen ataý, oǵan deıin Kereký dep ózgertý jaıly usynystar túsken bolatyn.
Qala ataýyn ózgertý týraly másele turǵyndar arasynda pikirtalas týdyrdy. Tipti, Pavlodar qalalyq ákimdigi 2020 jyly ulttyq sanaq ótkiziledi degen resmı málimdeme jasaýǵa májbúr boldy. Sanaqtyń ýaqytyly ári tıanaqty ótýin qamtamasyz etý úshin 2020 jyldyń 1 qańtarynan 31 jeltoqsanǵa deıingi kezeńde onomastıkalyq sıpattaǵy máseleler, onyń ishinde oblys ortalyǵynyń ataýyn ózgertý máselesi qarastyrylmaıdy.
