وبلىس اكىمى 2020 جىلعى ساناقتىڭ سوڭىنا دەيىن بۇل ماسەلە قاراستىرىلمايتىنىن تاعى دا ەسكە سالدى.
"قالا اتاۋىن وزگەرتۋ ماسەلەسى كۇن تارتىبىندە تۇرعان جوق. تەك اتاۋدى وزگەرتۋ ارقىلى بارلىق ماسەلە بىردەن شەشىمىن تاپسا عوي...
بۇل جەردە اقشا جۇمساۋ، بەلگىلەردى وزگەرتۋ، بارلىق قۇجاتتاما ماسەلەلەرى بار. ول بيزنەسكە دە، مەملەكەتتىك ورگاندار ءۇشىن دە اۋقىمدى جۇمىس بولماق.
بۇل ماسەلەنىڭ تەك ءبىر جاعى عانا"، - دەپ اتاپ ءوتتى سقاقوۆ تىلشىلەرمەن كەزدەسۋ بارىسىندا.
"ءيا، ارينە، بۇل قالانىڭ تاريحي مادەنيەتىمەن، پايدا بولۋىمەن جانە قالىپتاسۋىمەن بايلانىستى باسقا دا نارسەلەر بار. ءبىراق، مەنىڭ ويىمشا، بۇل ماسەلەنى ءبىرىنشى كەزەككە قويۋدىڭ ەش قاجەتى جوق"، - دەگەن وبلىس باسشىسى ودان گورى كۇش-جىگەردى وڭىردەگى باسقا ماسەلەلەردى شەشۋگە جۇمساۋ كەرەكتىگىن العا تارتتى.
ايتا كەتسەك، قالاداعى بىرنەشە باستاماشىل توپ جانە قوعامدىق بىرلەستىك وكىلدەرى، اقساقالدار پاۆلودار اتاۋىن سارىارقا نەمەسە ەرتىس دەپ وزگەرتۋدى ۇسىنعان ەدى.
سوڭعى اتاۋدى ءماجىلىس دەپۋتاتى ايزادا قۇرمانوۆا قولداپ وتىر. 2019 جىلى قالانى كەنەسارى حاننىڭ اتىمەن اتاۋ، وعان دەيىن كەرەكۋ دەپ وزگەرتۋ جايلى ۇسىنىستار تۇسكەن بولاتىن.
قالا اتاۋىن وزگەرتۋ تۋرالى ماسەلە تۇرعىندار اراسىندا پىكىرتالاس تۋدىردى. ءتىپتى، پاۆلودار قالالىق اكىمدىگى 2020 جىلى ۇلتتىق ساناق وتكىزىلەدى دەگەن رەسمي مالىمدەمە جاساۋعا ءماجبۇر بولدى. ساناقتىڭ ۋاقىتىلى ءارى تياناقتى ءوتۋىن قامتاماسىز ەتۋ ءۇشىن 2020 جىلدىڭ 1 قاڭتارىنان 31 جەلتوقسانعا دەيىنگى كەزەڭدە ونوماستيكالىق سيپاتتاعى ماسەلەلەر، ونىڭ ىشىندە وبلىس ورتالىعىنىڭ اتاۋىن وزگەرتۋ ماسەلەسى قاراستىرىلمايدى.
