Sońǵy ýaqytta Pavlodar óńirinde memlekettik tildiń qulashyn keńeitý, qoldanysyn arttyrý baǵytynda nátijeli jumystar júrgizilip jatyr.
Óńirdegi «Ana tili» ortalyǵy memlekettik tildi orystildi qaýymǵa meńgertý maqsatynda birqatar jobalardy qolǵa alǵan bolatyn.
Ortalyq mamandary qazaq tilin birinshi kezekte balabaqsha tárbieshileri jetik meńgerý tiis dep sanaidy. Óser urpaqqa tálim-tárbie beretin balabaqsha tárbieshileri memlekettik tilde múdirmei sóileitin bolsa, bul óz kezeginde baldyrǵandardyń da qazaq tilin erte bastan úirenýine jol ashary sózsiz.
Qazirgi kúni «Ana tili» ortalyǵy balabaqsha tárbieshileri qazaq tilin oqytý kýrstaryn tramvailarda ótkizýde. Bul da tegin emes, oblysta tramvai jelisi jaqsy damyǵan. Bul óz kezeginde memlekettik tildi buqaralyq deńgeide nasihattaýda taptyrmaityn ádis.
«Ana tili» ortalyǵynyń jetekshisi Sholpan Kinjikovanyń aitýynsha tramvaidaǵy memlekettik tildi meńgerý kýrstaryna orys tobynda tálim beretin balabaqsha tárbieshileri belsendi túrde qatysyp jatyr.
– Osynaý jobany «Rýhani jańǵyrý» baǵdarlamasy aiasynda qolǵa alyp otyrmyz. Baǵdarlama negizinde qazaq tilin úiretýge arnalǵan «Flesh trening» jobasy jasaldy. Memlekettik tildi úiretýdi tórt qabyrǵada qamalǵansha, tutas qalany aralap shyǵatyn travmailarda ótkizsek degen ideia áýelden oiymyzda bolǵan. Bul jobamyzdy «Nur Otan» partiiasynyń oblystyq filialy, tramvai basqarmasy jáne oblystyq tilderdi damytý jónindegi basqarmasy birden qoldap áketti.
Budan bylai qazaq tilin oqytý sabaqtary tramvailarda ótkiziletin bolady. Bul bir jaǵynan memlekettik tildiń nasihatyn jasaýda óńirde buryn-sońdy bolmaǵan tyń ádis.
Sabaqtardyń joba-josparyn da barynsha pysyqtadyq. Árbir til úirený kýrstary belgili bir taqyrypqa arnalady. Aitalyq, búgingi sabaǵymyzdyń taqyryby – Pavlodar qalasy.
Kýrsqa qatysatyn balabaqsha tárbieshileri budan buryn ótken taqyryptardy qaitalai otyryp, Pavlodardyń keskin-kelbetin qazaq tilinde sýrettep shyǵady. Qalanyń kórikti jerlerin memlekettik tilde baiandap, óz oilaryn ortaǵa salady.
Balabaqsha tárbieshileriniń memlekettik tildi meńgergeni asa mańyzdy. Olar qazaq tilinde oilaý jáne sóileý qabiletterin damytsa, tiisinshe úirengenin baldyrǵandarmen de bólisedi, – deidi bul rette «Ana tili» ortalyǵynyń jetekshisi Sholpan Kinjikova.
Onyń atap ótkenindei, qazirgi tańda osynaý joba aiasynda barlyǵy 10-15 adam turatyn eki topta memlekettik tildi úirenip jatyr. Sabaq 2 aiǵa jalǵasady, balabaqsha tárbieshileri aptasyna 3-4 ret qazaq tilin úirený kýrstaryna qatysady.
Osynaý kýrstyń bereri mol ekenin balabaqsha tárbieshileri da jaqsy túsinip otyr. Pavlodar qalasy №111 balabaqshasynyń tárbieshisi Evgeniia Zaitsevanyń pikirinshe, kún ótken saiyn memlekettik tilge degen suranys artyp keledi. Memlekettik tildi meńgergen kadrlardyń kareralyq baspaldaqpen ósý múmkindigi de mol.
– Meniń tárbieshi bolǵanyma biyl 15 jyl toldy. Osynaý kýrsqa qatysyp júrgenime bir jarym aiǵa jýyqtady. Sózdik qorym tolyǵyp qaldy. Qazaqsha amandasyp, dúkennen ózime kerekti taýardy satyp alyp júrmin. Eń bastysy, úirengenińdi ómirde qoldana bilý ǵoi. Osy jaǵynan qazaq tilin úiretý kýrstary nátijesin berýde.
Alǵashqy sabaqtar kabinette ótken bolatyn. Kýrstar tramvaida ótkizilgeli beri buǵan qyzyǵýshylyq tanytqan azamattardyń qatary kóbeiip keledi.
Kýrsqa deiin de qazaq tilin shamaly biletin edim. Atalǵan jobanyń nátijesinde memlekettik tildi meńgerýdegi deńgeiimniń ájeptáýir óskenin baiqadym.
Balalarym bastaýysh synypta oqidy. Buryndaǵy qazaq tili sabaǵyna kómektesken kezde, keibir sózderdiń maǵynasyn túsinbei qinalýshy edik. Qazir ol kezeńnen ótken sekildimiz. Qazaq tilinen sabaǵyna daiyndalatyn balalaryma da kómektesetin deńgeige jettim.
Osy kýrs arqyly sózdiń jalǵaýlaryn durys jalǵap úirenip, jumystaǵy sózdik qorym kóbeidi. Meniń balabaqshadaǵy tobymda barlyǵy 28 bala bar. Talap boiynsha biz olarǵa 3 tilde tárbie berý kerekpiz. Osy kýrstyń nátijesinde baldyrǵanmen qazaqsha tildesýdi jetik deńgeide meńgeretinime senimdimin» deidi ol.
