سوڭعى ۋاقىتتا پاۆلودار وڭىرىندە مەملەكەتتىك ءتىلدىڭ قۇلاشىن كەڭەيتۋ، قولدانىسىن ارتتىرۋ باعىتىندا ناتيجەلى جۇمىستار جۇرگىزىلىپ جاتىر.
وڭىردەگى «انا ءتىلى» ورتالىعى مەملەكەتتىك ءتىلدى ءورىستىلدى قاۋىمعا مەڭگەرتۋ ماقساتىندا ءبىرقاتار جوبالاردى قولعا العان بولاتىن.
ورتالىق ماماندارى قازاق ءتىلىن ءبىرىنشى كەزەكتە بالاباقشا تاربيەشىلەرى جەتىك مەڭگەرۋ ءتيىس دەپ سانايدى. وسەر ۇرپاققا تالىم-تاربيە بەرەتىن بالاباقشا تاربيەشىلەرى مەملەكەتتىك تىلدە مۇدىرمەي سويلەيتىن بولسا، بۇل ءوز كەزەگىندە بالدىرعانداردىڭ دا قازاق ءتىلىن ەرتە باستان ۇيرەنۋىنە جول اشارى ءسوزسىز.
قازىرگى كۇنى «انا ءتىلى» ورتالىعى بالاباقشا تاربيەشىلەرى قازاق ءتىلىن وقىتۋ كۋرستارىن ترامۆايلاردا وتكىزۋدە. بۇل دا تەگىن ەمەس، وبلىستا ترامۆاي جەلىسى جاقسى دامىعان. بۇل ءوز كەزەگىندە مەملەكەتتىك ءتىلدى بۇقارالىق دەڭگەيدە ناسيحاتتاۋدا تاپتىرمايتىن ءادىس.
«انا ءتىلى» ورتالىعىنىڭ جەتەكشىسى شولپان كىنجىكوۆانىڭ ايتۋىنشا ترامۆايداعى مەملەكەتتىك ءتىلدى مەڭگەرۋ كۋرستارىنا ورىس توبىندا ءتالىم بەرەتىن بالاباقشا تاربيەشىلەرى بەلسەندى تۇردە قاتىسىپ جاتىر.
– وسىناۋ جوبانى «رۋحاني جاڭعىرۋ» باعدارلاماسى اياسىندا قولعا الىپ وتىرمىز. باعدارلاما نەگىزىندە قازاق ءتىلىن ۇيرەتۋگە ارنالعان «فلەش ترەنينگ» جوباسى جاسالدى. مەملەكەتتىك ءتىلدى ۇيرەتۋدى ءتورت قابىرعادا قامالعانشا، تۇتاس قالانى ارالاپ شىعاتىن تراۆمايلاردا وتكىزسەك دەگەن يدەيا اۋەلدەن ويىمىزدا بولعان. بۇل جوبامىزدى «نۇر وتان» پارتياسىنىڭ وبلىستىق فيليالى، ترامۆاي باسقارماسى جانە وبلىستىق تىلدەردى دامىتۋ جونىندەگى باسقارماسى بىردەن قولداپ اكەتتى.
بۇدان بىلاي قازاق ءتىلىن وقىتۋ ساباقتارى ترامۆايلاردا وتكىزىلەتىن بولادى. بۇل ءبىر جاعىنان مەملەكەتتىك ءتىلدىڭ ناسيحاتىن جاساۋدا وڭىردە بۇرىن-سوڭدى بولماعان تىڭ ءادىس.
ساباقتاردىڭ جوبا-جوسپارىن دا بارىنشا پىسىقتادىق. ءاربىر ءتىل ۇيرەنۋ كۋرستارى بەلگىلى ءبىر تاقىرىپقا ارنالادى. ايتالىق، بۇگىنگى ساباعىمىزدىڭ تاقىرىبى – پاۆلودار قالاسى.
كۋرسقا قاتىساتىن بالاباقشا تاربيەشىلەرى بۇدان بۇرىن وتكەن تاقىرىپتاردى قايتالاي وتىرىپ، پاۆلوداردىڭ كەسكىن-كەلبەتىن قازاق تىلىندە سۋرەتتەپ شىعادى. قالانىڭ كورىكتى جەرلەرىن مەملەكەتتىك تىلدە بايانداپ، ءوز ويلارىن ورتاعا سالادى.
بالاباقشا تاربيەشىلەرىنىڭ مەملەكەتتىك ءتىلدى مەڭگەرگەنى اسا ماڭىزدى. ولار قازاق تىلىندە ويلاۋ جانە سويلەۋ قابىلەتتەرىن دامىتسا، تيىسىنشە ۇيرەنگەنىن بالدىرعاندارمەن دە بولىسەدى، – دەيدى بۇل رەتتە «انا ءتىلى» ورتالىعىنىڭ جەتەكشىسى شولپان كىنجىكوۆا.
ونىڭ اتاپ وتكەنىندەي، قازىرگى تاڭدا وسىناۋ جوبا اياسىندا بارلىعى 10-15 ادام تۇراتىن ەكى توپتا مەملەكەتتىك ءتىلدى ۇيرەنىپ جاتىر. ساباق 2 ايعا جالعاسادى، بالاباقشا تاربيەشىلەرى اپتاسىنا 3-4 رەت قازاق ءتىلىن ۇيرەنۋ كۋرستارىنا قاتىسادى.
وسىناۋ كۋرستىڭ بەرەرى مول ەكەنىن بالاباقشا تاربيەشىلەرى دا جاقسى ءتۇسىنىپ وتىر. پاۆلودار قالاسى №111 بالاباقشاسىنىڭ تاربيەشىسى ەۆگەنيا زايسيەۆانىڭ پىكىرىنشە، كۇن وتكەن سايىن مەملەكەتتىك تىلگە دەگەن سۇرانىس ارتىپ كەلەدى. مەملەكەتتىك ءتىلدى مەڭگەرگەن كادرلاردىڭ كارەرالىق باسپالداقپەن ءوسۋ مۇمكىندىگى دە مول.
– مەنىڭ تاربيەشى بولعانىما بيىل 15 جىل تولدى. وسىناۋ كۋرسقا قاتىسىپ جۇرگەنىمە ءبىر جارىم ايعا جۋىقتادى. سوزدىك قورىم تولىعىپ قالدى. قازاقشا امانداسىپ، دۇكەننەن وزىمە كەرەكتى تاۋاردى ساتىپ الىپ ءجۇرمىن. ەڭ باستىسى، ۇيرەنگەنىڭدى ومىردە قولدانا ءبىلۋ عوي. وسى جاعىنان قازاق ءتىلىن ۇيرەتۋ كۋرستارى ناتيجەسىن بەرۋدە.
العاشقى ساباقتار كابينەتتە وتكەن بولاتىن. كۋرستار ترامۆايدا وتكىزىلگەلى بەرى بۇعان قىزىعۋشىلىق تانىتقان ازاماتتاردىڭ قاتارى كوبەيىپ كەلەدى.
كۋرسقا دەيىن دە قازاق ءتىلىن شامالى بىلەتىن ەدىم. اتالعان جوبانىڭ ناتيجەسىندە مەملەكەتتىك ءتىلدى مەڭگەرۋدەگى دەڭگەيىمنىڭ اجەپتاۋىر وسكەنىن بايقادىم.
بالالارىم باستاۋىش سىنىپتا وقيدى. بۇرىنداعى قازاق ءتىلى ساباعىنا كومەكتەسكەن كەزدە، كەيبىر سوزدەردىڭ ماعىناسىن تۇسىنبەي قينالۋشى ەدىك. ءقازىر ول كەزەڭنەن وتكەن سەكىلدىمىز. قازاق تىلىنەن ساباعىنا دايىندالاتىن بالالارىما دا كومەكتەسەتىن دەڭگەيگە جەتتىم.
وسى كۋرس ارقىلى ءسوزدىڭ جالعاۋلارىن دۇرىس جالعاپ ۇيرەنىپ، جۇمىستاعى سوزدىك قورىم كوبەيدى. مەنىڭ بالاباقشاداعى توبىمدا بارلىعى 28 بالا بار. تالاپ بويىنشا ءبىز ولارعا 3 تىلدە تاربيە بەرۋ كەرەكپىز. وسى كۋرستىڭ ناتيجەسىندە بالدىرعانمەن قازاقشا تىلدەسۋدى جەتىك دەڭگەيدە مەڭگەرەتىنىمە سەنىمدىمىن» دەيدى ول.
