Arnaıy kabınetterde mamandar shaǵym aıtyp kelgen azamattardyń suraqtaryna jaýap beredi. Sondaı-aq, «Ertis – adaldyq alańy» front-ofısi de osy jerde ornalasqan. Sybaılas jemqorlyq faktilerine kezikken bıznesmendermen de jumys jolǵa qoıylatyn bolady. Mundaı faktilermen kezikken jaǵdaıda, shuǵyl áreket etemiz deıdi korrýpsıaǵa qarsy qyzmet ókilderi.
Servıs-ortalyqtyń ashylý saltanatyna oblys ákimi Bolat Baqaýov qatysty. Aımaq basshysy bul jerde shoǵyrlanǵan qyzmet túrleri bolashaqta memleket pen halyq arasyndaǵy qarym-qatynastyń damýyna septigin tıgizetinine senimdi.
– Elbasymyzdyń tapsyrmasy boıynsha «Ertis – adaldyq alańy» jobalyq ofısi 2018 jyldyń jeltoqsanynda ashylǵan bolatyn. Bul jobanyń aıasynda oblysymyzda úlken jumystar atqarylýda. Memlekettik organdar ońtaılandyrylýda, front-ofıster ashylyp, azamattardyń ótinishteri men shaǵymdarymen jumys jasalýda. Memleket basshysynyń joldaýynda aıtylǵan «Halyq únine qulaq asatyn memleket» tujyrymdamasy iske asyrylýda. Biz qoǵam suranystaryna saı jyldam áreket etýdemiz. Sol úshin de oblysymyzdyń qalalary men aýdandarynda front-ofıster jumys isteýde, – dedi oblys ákimi.
Antikor Ortalygy-na kelgen azamattarǵa EGOV portaly arqyly aqparat alýǵa da múmkindik mol. Bul jerde «Azamattarǵa qyzmet kórsetý ortalyǵynyń» arnaıy termınaly ornalasqan. Budan bólek balalar buryshy da qarastyrylǵan.
