ارنايى كابينەتتەردە ماماندار شاعىم ايتىپ كەلگەن ازاماتتاردىڭ سۇراقتارىنا جاۋاپ بەرەدى. سونداي-اق، «ەرتىس – ادالدىق الاڭى» ءفرونت-وفيسى دە وسى جەردە ورنالاسقان. سىبايلاس جەمقورلىق فاكتىلەرىنە كەزىككەن بيزنەسمەندەرمەن دە جۇمىس جولعا قويىلاتىن بولادى. مۇنداي فاكتىلەرمەن كەزىككەن جاعدايدا، شۇعىل ارەكەت ەتەمىز دەيدى كوررۋپسياعا قارسى قىزمەت وكىلدەرى.
سەرۆيس-ورتالىقتىڭ اشىلۋ سالتاناتىنا وبلىس اكىمى بولات باقاۋوۆ قاتىستى. ايماق باسشىسى بۇل جەردە شوعىرلانعان قىزمەت تۇرلەرى بولاشاقتا مەملەكەت پەن حالىق اراسىنداعى قارىم-قاتىناستىڭ دامۋىنا سەپتىگىن تيگىزەتىنىنە سەنىمدى.
– ەلباسىمىزدىڭ تاپسىرماسى بويىنشا «ەرتىس – ادالدىق الاڭى» جوبالىق ءوفيسى 2018 جىلدىڭ جەلتوقسانىندا اشىلعان بولاتىن. بۇل جوبانىڭ اياسىندا وبلىسىمىزدا ۇلكەن جۇمىستار اتقارىلۋدا. مەملەكەتتىك ورگاندار وڭتايلاندىرىلۋدا، فرونت-وفيستەر اشىلىپ، ازاماتتاردىڭ وتىنىشتەرى مەن شاعىمدارىمەن جۇمىس جاسالۋدا. مەملەكەت باسشىسىنىڭ جولداۋىندا ايتىلعان «حالىق ۇنىنە قۇلاق اساتىن مەملەكەت» تۇجىرىمداماسى ىسكە اسىرىلۋدا. ءبىز قوعام سۇرانىستارىنا ساي جىلدام ارەكەت ەتۋدەمىز. سول ءۇشىن دە وبلىسىمىزدىڭ قالالارى مەن اۋداندارىندا فرونت-وفيستەر جۇمىس ىستەۋدە، – دەدى وبلىس اكىمى.
Antikor Ortalygy-نا كەلگەن ازاماتتارعا EGOV پورتالى ارقىلى اقپارات الۋعا دا مۇمكىندىك مول. بۇل جەردە «ازاماتتارعا قىزمەت كورسەتۋ ورتالىعىنىڭ» ارنايى تەرمينالى ورنالاسقان. بۇدان بولەك بالالار بۇرىشى دا قاراستىرىلعان.
