Sózimizge dálel, kúni keshe Pavlodar óńirinde «Rýhanı jańǵyrý» baǵdarlamasy aıasynda áıgili «Qorlan» ániniń avtory Estaı Berkimbaıulynyń eskertkishi turǵyzylatyny belgili boldy.
Eskertkish qalanyń qaq ortasynda Estaıdyń atymen atalatyn mádenıet saraıynyń aldynda boı kótermek.
Osy másele oblys ákiminiń orynbasary Ashat Oralovtyń qatysýymen ótken «Rýhanı jańǵyrý» baǵdarlamasy jónindegi saraptaý keńesiniń kezekti otyrysynda sóz boldy.
Jıyn barysynda oblystaǵy qala men aýdan ókilderi óz jobalarymen tanystyrdy. Oblys ákiminiń orynbasary bul máselede sannyń emes, sapanyń mańyzdy ekendigin eskertip ótti.
– Sońǵy jyldary kóptegen ıgi jobalar iske asyryldy, – dedi Ashat Oralov. – Alaıda bizderge jobalardyń sany emes, sapasy qajet. Oblys, respýblıka halqy úlgi etetin erekshe jobalar kútemiz. Pavlodardyń ózge oblystarǵa úlgi bolarlyqtaı áleýeti bar.
Óz kezeginde Pavlodar ákiminiń orynbasary Saıan Muqanov «Rýhanı jańǵyrý» baǵdarlamasy sheńberinde bıylǵy jyly Pavlodar qalasynda júzege asyrylatyn jobalardy tizbelep ótti. Máselen, bıylǵy jyly áıgili ánshi, sazger Estaı Berkimbaev eskertkishi men mýzeıi ashylmaq. İlgeride aıtyp ketkenimizdeı, eńseli eskertkish Estaı atyndaǵy mádenıet saraıynyń mańynda boı kóterse, mýzeı bolsa, saraı ishinde ashylady.
Joba quny 35 mıllıon teńge. Ony júzege asyrý demeýshiler tarapynan qarjylandyrylmaq.
Qazaq rýhanı-mádenı ómirinde óshpes is qaldyrǵan qaıratkerlerdi ulyqtaý jumystary munymen shektelmek emes.
Bıylǵy jyly Ekibastuz qalasynda qazaqtyń taǵy bir tarlanbozy, aty ańyzǵa aınalǵan Baýyrjan Momyshulynyń monýmenti boı kóteredi. Monýment bıylǵy jyldyń aıaǵyna deıin qaladaǵy ortalyq kóshelerdiń birinde men mundalap turatyn bolady.
Qalalyq ishki saıasat bóliminiń basshysy Zınaıda Muhametjanovanyń aıtýynsha, bul úshin Stroıtelnaıa kóshesi áskerbasynyń atyna aýystyryldy. Kenshiler qalasynda júzege asyrylatyn taǵy bir tyń joba – Sábıler aleıasy.
Oǵan sáıkes, Ekibastuzda týǵan árbir náresteniń qurmetine ata-anasy belgilengen jerge bir túp aǵash otyrǵyzady.
Maı aýdany bolsa, «Rýhanı jańǵyrý» aıasynda «Alma baǵy» jobasyn usyndy. Ol boıynsha aýdan ortalyǵynda tamshylap sýarý tásilimen alma aǵashyn egip, ónim alyp, jastardy eńbekke baýlý kózdelip otyr.
