Reseidiń Federaldyq qaýipsizdik qyzmeti Telegram negizin qalaýshy Pavel Dýrovqa qatysty tekserý júrgizip jatyr. Bul týraly "Rossiiskaia gazeta" FQQ materialdaryna súienip jazǵan, dep habarlaidy Dalanews.kz.
Basylymnyń málimetinshe, tekserý Resei Qylmystyq kodeksiniń 205.1-babynyń 1.1-bóligi - terroristik qyzmetke járdemdesý kúdigi boiynsha qozǵalǵan qylmystyq is aiasynda ótip jatyr.
Materialda 2022 jyldan beri Telegram qoldanylǵan qylmystar sany 153 myńnan asqany aitylǵan. Sonyń shamamen 33 myńy diversiialyq-terroristik jáne ekstremistik árekettermen bailanysty dep kórsetiledi. Olardyń ishinde jarylys uiymdastyrý, órt qoiý jáne shabýyl jasaý faktileri bar.
Sondai-aq FQQ osy kezeńde messendjer arqyly daiyndalǵan 475 teraktiniń aldyn alǵanyn málimdegen. Budan bólek, "Krokýs Siti Holldaǵy" teraktini uiymdastyrǵandar da áreketterin Telegram arqyly úilestirgeni atalyp ótken.
Basylymnyń jazýynsha, reseilik áskeri tilshiler men áskeri qyzmetkerlerge qarsy qastandyq daiyndaǵan tulǵalar yqtimal qurbandardyń týystary, júrip-turý baǵyttary men kún tártibi týraly málimet jinaýda da servis múmkindikterin paidalanǵan.
Sonymen birge maqalada Telegram komandasy Roskomnadzordyń zańsyz kontentti joiý týraly 150 myńnan astam talabyna jaýap bermegeni týraly ýáj keltirilgen.
Buǵan deiin reseilik áskeri sarapshy Pavel Dýrovty Kievke keibir qupiia derekterdiń jetýine qatysy bolýy múmkin dep aiyptaǵany da aityldy.
