Telegram messendjeriniń negizin qalaýshy Pavel Dýrov Frantsiia aýmaǵynan shyǵa almai otyr. Onyń isi sotqa bir jyldan keiin jetýi múmkin. Bul týraly Wired jýrnaly frantsýz prokýratýrasynyń ókili Mailis de Rekke silteme jasap habarlady, dep jazady Dalanews.kz.
De Rek bul másele boiynsha qandai da bir beibit kelisim jasaýǵa áli erte ekenin atap ótti.
Prokýrordyń aitýynsha, Dýrovqa order berý týraly sheshim prokýratýra Telegram-nyń quqyq qorǵaý organdarynyń suranystaryna jaýap bermei, túrli departamenttegi tergeýlerdiń tyǵyryqqa tirelýine sebep bolǵanyn túsingennen keiin qabyldaǵan. Frantsiia biligi kásipkerdiń únsizdigin “qylmysqa sybailas qatysy bar” dep teńestirdi.
Libération basylymynyń málimetine súiengen Wired jýrnalynyń jazýynsha, 2013 jyldan 2024 jylǵa deiingi aralyqta frantsýz jandarmeriiasy Telegram-ǵa jiberilgen 2460 resmi suranystyń jaýapsyz qalǵanyn anyqtaǵan.
Telegram-nyń syrtqy jáne úkimettik bailanystar bólimin basqarǵan Iýliia Konli Dýrovty platformanyń ishindegi oqiǵalar úshin jaýapty dep sanaý qisynsyz ekenin málimdedi. Onyń pikirinshe, bul jaǵdai kontent moderatsiiasy salasyndaǵy mamandardyń tapshylyǵymen bailanysty.
Aita keteiik, buǵan deiin Pavel Dýrovqa Frantsiiadan shyǵýǵa tyiym salynǵany týraly jazǵan edik.
Ol Frantsiia biligine bes million eýro kepildik tóleýi kerek. Bul týraly Parij prokýratýrasynyń málimdemesinde aitylǵan.
Prokýratýranyń málimdemesinde quqyq qorǵaý organdarynyń talaby boiynsha tergeýge qajetti aqparat berýden bas tartý, kiberqylmys, aqshany jylystatý, aldyn ala deklaratsiiasyz kriptologiialyq qurylǵyny ákelý, balanyń sýretterin taratýǵa qatysý siiaqty alty quqyq buzýshylyq týraly aitylǵan.
Qujatta Frantsiiada aldyn ala tergeý aqpan aiynda, iaǵni habarlanǵan ýaqyttan erte bastalǵany atalyp ótken. Tergeýge sot ótinishterine jaýaptardyń tolyq bolmaýy sebep boldy.
Prokýratýra Dýrovqa qatysty taǵy eki tergeý júrip jatqanyn habarlady. Olarmen frantsýz jandarmeriiasynyń kiber bólimshesi men kedendik alaiaqtyqpen kúres departamenti ainalysady.
Sot sheshimine sáikes, endi ol aptasyna eki ret politsiiaǵa kelip, belgilenip otyrýy shart.
Pavel Dýrov zańsyz tranzaktsiialar jasaityn onlain-platformany basqarǵany úshin 10 jylǵa deiin bas bostandyǵynan aiyrylýy múmkin.
Eske salaiyq, Pavel Dýrov tamyzdyń 25-ine qaraǵan túni Ázerbaijannan jeke ushaqpen kele jatqanda ustaldy. 26 tamyzda Parij prokýratýrasy Telegram platformasy arqyly jasalǵan qylmystarǵa qatysty shilde aiynda qylmystyq is qozǵalǵanyn habarlady.
