Parijde IýNESKO-nyń shtab-páterinde belgili jazýshy, qazaq balalar ádebietiniń klassigi Berdibek Soqpaqbaevtyń 100 jyldyǵyna arnalǵan konferentsiia ótti. Is-shara aiasynda «Meniń atym Qoja» kitabynyń frantsýz tiline aýdarylǵan nusqasynyń tusaýkeseri uiymdastyryldy, – dep habarlaidy Dalanews.kz QR Mádeniet jáne aqparat ministrliginiń baspasóz qyzmetine silteme jasap.
Konferentsiiaǵa IýNESKO Bas direktorynyń orynbasary Ernesto Ottone, QR Mádeniet jáne aqparat ministrliginiń Arhiv, Qujattama jáne kitap isi komitetiniń tóraǵasy Rýstam Áli, Qazaqstan Jazýshylar odaǵynyń tóraǵasy Mereke Qulkenov jáne TÚRKSOI halyqaralyq uiymyndaǵy Qazaqstan ókili Baqytjan Omar qatysty.
Qatysýshylar Berdibek Soqpaqbaev kitabynyń aýdarmasy frantsýz oqyrmandaryna qazaq mádenietin tanytyp, Qazaqstan halqynyń bai dástúrleri men qundylyqtaryn ashatynyna senim bildirdi.
Berdibek Soqpaqbaevtyń 100 jyldyǵynyń IýNESKO-nyń ataýly datalar kúntizbesine engizilýi onyń álemdik mádenietke qosqan úlesiniń mańyzdylyǵyn kórsetedi.
1952 jyldan bastap Qazaqstan Jazýshylar odaǵynyń múshesi bolǵan qalamger kózi tirisinde-aq qazaq balalar ádebietiniń klassigi retinde tanyldy. Balalardyń ǵana emes, eresekterdiń de súiikti jazýshysyna ainalǵan onyń shyǵarmashylyǵy urpaq tárbiesinde áli kúnge ózektiligin joimai keledi.
Qazaqstan tarapy IýNESKO-ǵa is-sharany uiymdastyrýdaǵy qoldaýy úshin alǵys bildirip, qazaq halqynyń murasyn halyqaralyq arenada nasihattaityn mádeni is-sharalardyń mańyzdylyǵyn atap ótti.
