پاريجدە يۋنەسكو-نىڭ شتاب-پاتەرىندە بەلگىلى جازۋشى، قازاق بالالار ادەبيەتىنىڭ كلاسسيگى بەردىبەك سوقپاقبايەۆتىڭ 100 جىلدىعىنا ارنالعان كونفەرەنسيا ءوتتى. ءىس-شارا اياسىندا «مەنىڭ اتىم قوجا» كىتابىنىڭ فرانسۋز تىلىنە اۋدارىلعان نۇسقاسىنىڭ تۇساۋكەسەرى ۇيىمداستىرىلدى، – دەپ حابارلايدى Dalanews.kz ق ر مادەنيەت جانە اقپارات مينيسترلىگىنىڭ باسپا ءسوز قىزمەتىنە سىلتەمە جاساپ.
كونفەرەنسياعا يۋنەسكو باس ديرەكتورىنىڭ ورىنباسارى ەرنەستو وتتونە، ق ر مادەنيەت جانە اقپارات مينيسترلىگىنىڭ ارحيۆ، قۇجاتتاما جانە كىتاپ ءىسى كوميتەتىنىڭ ءتوراعاسى رۋستام ءالي، قازاقستان جازۋشىلار وداعىنىڭ ءتوراعاسى مەرەكە قۇلكەنوۆ جانە تۇركسوي حالىقارالىق ۇيىمىنداعى قازاقستان وكىلى باقىتجان ومار قاتىستى.
قاتىسۋشىلار بەردىبەك سوقپاقبايەۆ كىتابىنىڭ اۋدارماسى فرانسۋز وقىرماندارىنا قازاق مادەنيەتىن تانىتىپ، قازاقستان حالقىنىڭ باي داستۇرلەرى مەن قۇندىلىقتارىن اشاتىنىنا سەنىم ءبىلدىردى.
بەردىبەك سوقپاقبايەۆتىڭ 100 جىلدىعىنىڭ يۋنەسكو-نىڭ اتاۋلى داتالار كۇنتىزبەسىنە ەنگىزىلۋى ونىڭ الەمدىك مادەنيەتكە قوسقان ۇلەسىنىڭ ماڭىزدىلىعىن كورسەتەدى.
1952 جىلدان باستاپ قازاقستان جازۋشىلار وداعىنىڭ مۇشەسى بولعان قالامگەر كوزى تىرىسىندە-اق قازاق بالالار ادەبيەتىنىڭ كلاسسيگى رەتىندە تانىلدى. بالالاردىڭ عانا ەمەس، ەرەسەكتەردىڭ دە سۇيىكتى جازۋشىسىنا اينالعان ونىڭ شىعارماشىلىعى ۇرپاق تاربيەسىندە ءالى كۇنگە وزەكتىلىگىن جويماي كەلەدى.
قازاقستان تاراپى يۋنەسكو-عا ءىس-شارانى ۇيىمداستىرۋداعى قولداۋى ءۇشىن العىس ءبىلدىرىپ، قازاق حالقىنىڭ مۇراسىن حالىقارالىق ارەنادا ناسيحاتتايتىن مادەني ءىس-شارالاردىڭ ماڭىزدىلىعىن اتاپ ءوتتى.
