Temirtaýda taksi júrgizýshisi tórt jasar qyzdy ózimen birge ala ketip, bir saǵat boiy anasyna qaitarmaǵan.Bul týraly búldirshinniń anasy málimdedi, dep habarlaidy Dalanews.kz 31 arnaǵa silteme jasap.
Áieldiń sózinshe, ol InDrive qosymshasy arqyly taksi shaqyrǵan. Bir jasar sábiin qolyna alyp, aldymen tórt jasar qyzyn artqy oryndyqqa otyrǵyzǵan. Al ózi ekinshi betinen otyrýǵa bet alǵanda kólik qozǵalyp ketken.
Áiel qyzyn ajyratyp almaý úshin kólikti qýyp jetýge tyrysqan. Birneshe ret júrgizýshige qosymsha arqyly qońyraý shalǵan. Alaida jaýap bolmaǵan. Keiin júrgizýshi tapsyrysty jaýyp tastaǵan.
Qaraǵandy oblystyq PD aqparattyq saiasat bóliminiń ýaqytsha basshysy Jansaia Júnisova oqiǵaǵa qatysty pikir bildirdi.
"Avtokólik iesi anyqtalyp, júrgizýshimen bailanysqa shyqtyq. Jol boiynda júrgizýshi artqy oryndyqta eresek adamdarsyz otyrǵan balany baiqap, dereý keri qaityp, qyzdy anasyna tapsyrdy. Júrgizýshige jolaýshylardy tasymaldaý erejesin buzǵany jáne zańsyz kásipkerlik qyzmetimen ainalysqany úshin ákimshilik is qozǵaldy", - dedi ol.
Al kompaniia jaǵdaiǵa bailanysty tekseris júrgizýge ýáde berdi.
"Júrgizýshiniń akkaýnty dereý bloktaldy. Ishki taldaý kórsetkendei, kólik birneshe kilometr júrgennen keiin keri burylyp, bastapqy baǵytqa oralǵan. Júrgizýshiniń reitingi joǵary, buǵan deiin shaǵym túspegen. Qosymsha quqyq qorǵaý organdarynan qosymsha aqparat surap, tergeýdi jalǵastyratyn bolady", - dedi olar.
