تەمىرتاۋدا تاكسي جۇرگىزۋشىسى ءتورت جاسار قىزدى وزىمەن بىرگە الا كەتىپ، ءبىر ساعات بويى اناسىنا قايتارماعان.بۇل تۋرالى ءبۇلدىرشىننىڭ اناسى مالىمدەدى، دەپ حابارلايدى Dalanews.kz 31 ارناعا سىلتەمە جاساپ.

ايەلدىڭ سوزىنشە، ول InDrive قوسىمشاسى ارقىلى تاكسي شاقىرعان. ءبىر جاسار ءسابيىن قولىنا الىپ، الدىمەن ءتورت جاسار قىزىن ارتقى ورىندىققا وتىرعىزعان. ال ءوزى ەكىنشى بەتىنەن وتىرۋعا بەت العاندا كولىك قوزعالىپ كەتكەن.

ايەل قىزىن اجىراتىپ الماۋ ءۇشىن كولىكتى قۋىپ جەتۋگە تىرىسقان. بىرنەشە رەت جۇرگىزۋشىگە قوسىمشا ارقىلى قوڭىراۋ شالعان. الايدا جاۋاپ بولماعان. كەيىن جۇرگىزۋشى تاپسىرىستى جاۋىپ تاستاعان. 

قاراعاندى وبلىستىق پد اقپاراتتىق ساياسات ءبولىمىنىڭ ۋاقىتشا باسشىسى جانسايا ءجۇنىسوۆا وقيعاعا قاتىستى پىكىر ءبىلدىردى. 

"اۆتوكولىك يەسى انىقتالىپ، جۇرگىزۋشىمەن بايلانىسقا شىقتىق. جول بويىندا جۇرگىزۋشى ارتقى ورىندىقتا ەرەسەك ادامدارسىز وتىرعان بالانى بايقاپ، دەرەۋ كەرى قايتىپ، قىزدى اناسىنا تاپسىردى. جۇرگىزۋشىگە جولاۋشىلاردى تاسىمالداۋ ەرەجەسىن بۇزعانى جانە زاڭسىز كاسىپكەرلىك قىزمەتىمەن اينالىسقانى ءۇشىن اكىمشىلىك ءىس قوزعالدى"، - دەدى ول.

ال كومپانيا جاعدايعا بايلانىستى تەكسەرىس جۇرگىزۋگە ۋادە بەردى.

"جۇرگىزۋشىنىڭ اككاۋنتى دەرەۋ بلوكتالدى. ىشكى تالداۋ كورسەتكەندەي، كولىك بىرنەشە كيلومەتر جۇرگەننەن كەيىن كەرى بۇرىلىپ، باستاپقى باعىتقا ورالعان. جۇرگىزۋشىنىڭ رەيتينگى جوعارى، بۇعان دەيىن شاعىم تۇسپەگەن. قوسىمشا قۇقىق قورعاۋ ورگاندارىنان قوسىمشا اقپارات سۇراپ، تەرگەۋدى جالعاستىراتىن بولادى"، - دەدى ولار.