Búgin «Ózgeristiń sarýarlary» akselerasıalyq baǵdarlamasynan tolyq ótken 18 áleýmettik jobany arnaıy sertıfıkattarmen marapattady. Esterińizge sala keteıik, jyl basynda «Rýhanı jańǵyrý» qazaqstandyq qoǵamdyq damý ınstıtýtynyń bazasynda «Ózgeristiń sarýarlary» áleýmettik jobalar baǵdarlamasy qolǵa alynǵan bolatyn.
Baǵdarlamanyń maqsaty boıynsha, qoǵamdyq mańyzy zor aımaq kólemindegi jobalar elimizdiń ózge óńirlerine masshtabtalý úshin akselerasıanyń tolyq baǵdarlamasynan ótken.
Áý basta jobalar arasynda konkýrs uıymdastyrylyp, 120 ótinish tústi. Sonyń 46-sy ǵana iriktelip, akselerasıanyń bastapqy kezeńine qatysqanymen fınaldyq kezeńge 18-si ǵana ótti.
Mine, «Rýhanı jańǵyrý» QQDI bastaǵan «Ózgeristiń sarýarlary» baǵdarlamasynyń arqasynda bul jobalar akselerasıanyń tolyq satysynan ótip, óz jumystaryn respýblıkalyq kólemde masshtabtaýǵa múmkindik aldy.
– Joba úkimettik emes uıymdar arasynda úlken qyzyǵýshylyq týdyryp, «Ózgeristiń sarýarlary» baǵdarlamasyna qatysýǵa kóptegen ótinish tústi. Akselerasıanyń nátıjesinde biz «Rýhanı jańǵyrý» baǵdarlamasynyń básekege qabilettilik, pragmatızm, bilimniń saltanat qurýy, sananyń ashyqtyǵy, evolúsıalyq damý jáne ulttyq biregeılikti saqtaý syndy barlyq baǵyttaryn boıyna sińirgen jáne jarqyn bolashaqqa umtylǵan jańa jobalardy kópshilikke tanystyrdyq. Endigi kezekte bul jobalardyń barlyǵy «Rýhanı jańǵyrýdyń» brend-ambasadory jáne «Ózgeristiń elshileri» retinde ózge de áleýmettik bastamalarǵa úlgi bolady, – dedi «Rýhanı jańǵyrý» QQDI Basqarma Tóraǵasy Danıar Esın.
«Ózgeristiń sarýarlary» baǵdarlamasynyń birinshi maýsymy máresine jetkenimen oǵan qatysqan jobalar ári qaraı da «Rýhanı jańǵyrý» ınstıtýty tarapynan qoldaý taba bermek.
Máselen, kelesi jyly «Ózgeristiń sarýarlary» klýby qurylyp, áleýmettik bastamalar men jobalardy jańǵyrtý jáne damytý maqsatynda alqaqotan jıyndar ótkizetin ortaǵa aınalady.
Sondaı-aq, respýblıkalyq kólemde Sarapshylar keńesi qurylyp, jobalardy óńirlerge taratý úshin effektıvti jumystar júrgiziledi. Budan bólek, «Rýhanı jańǵyrý» ortalyǵynyń jetekshisi Janar Boqanovanyń aıtýynsha, iri megapolıster men oblys ákimderin akselerasıadan ótken 18 jobaǵa qoldaý kórsetýge shaqyrmaq.
Óz kezeginde Akselerator sarapshysy, «Trınt» qoǵamdyq qorynyń dırektory Iýlıa Natarova akselerasıaǵa qatysqan jobalardyń barlyǵy jumystaryn respýblıkalyq kólemde damytýǵa áleýetti ekendigin aıtty.
– Áý basta irikteý jasaǵanda da respýblıkalyq kólemde damýǵa múmkindikteri mol jobalar qarastyryldy. Biraq olarǵa kishkene qoldaý kórsetip jiberý kerek boldy. Nátıjesinde qazir olar aımaqtarǵa óz franshızalaryn usynyp, óńirlerde fılıaldaryn asha alatyn jaǵdaıǵa jetti, – dedi Iýlıa Natarova.
Jıyn sońynda akselerasıanyń tolyq baǵdarlamasynan ótken barlyq jobalarǵa arnaıy sertıfıkattar tabystaldy.
