Daryo basylymy belgili ekonomist Behzod Hoshimovtyń Ózbekstannyń ekonomikalyq bolashaǵyna qatysty pikirin jariialady. Sarapshy eldiń qazirgi damý qarqynyna qarap, Qazaqstanmen salystyrǵanda JIÓ deńgeiin qýyp jetý ońai maqsat emes ekenin atap ótti. Centralmedia24 atalǵan materialdyń aýdarmasyn usyndy, dep habarlaidy Dalanews.kz.
Qazaqstan men Ózbekstan arasyndaǵy alshaqtyq – 5-6 ese
Ekonomisttiń aitýynsha, eki eldiń jan basyna shaqqandaǵy jalpy ishki ónimi (JIÓ) arasynda aiyrmashylyq 5-6 esege deiin úlken.
“Qazirgi ósim qarqyny saqtalatyn bolsa, Ózbekstanǵa Qazaqstan deńgeiine jaqyndaý úshin keminde 30 jyl ýaqyt qajet bolady”, — deidi ol Cactuz atty YouTube-podkastynda.
Hoshimov atap ótkendei, damyǵan jáne damýshy elderdiń ekonomikalyq ósýindegi aiyrmashylyq aitarlyqtai.
“Máselen, AQSh-ta jan basyna shaqqandaǵy JIÓ – 76 myń dollar. Ondaǵy jyldyq ósim 2 paiyz bolsa, bul shamamen 1,5 myń dollar degen sóz. Al Ózbekstanda bul kórsetkish shamamen 3 myń dollar. 5 paiyzdyq ósimmen jan basyna shaqqanda bar bolǵany 150 dollar qosylady. Bai men kedei elderdegi ósim kóleminiń arajigi – osynda”, — deidi ekonomist.
Jylyna 8-10 paiyzdyq ósim bolmasa, nátije joq
Ekonomikanyń naqty ilgerileýi úshin Ózbekstannyń jyldyq ósimi keminde 8 paiyz bolýy kerek. Alaida Behzod Hoshimov buǵan kúmánmen qaraitynyn jasyrmaidy.
“Tipti jyl saiyn 5 paiyzdyq ósim bolǵannyń ózinde de, Qazaqstandy qýyp jetý óte qiyn. Biz búgingi tańda sonshalyqty artta qalyp qoidyq, olardyń deńgeiine jetý úshin árbir ózbek azamatynyń tabysy alty ese ósýi qajet. Biraq bul ońailyqpen sheshiletin nárse emes. Onyń ústine, Ózbekstan tipti orta tabysty elder qataryna qosyla ala ma, joq pa — bul da kúmán týdyratyn másele”, – deidi Hoshimov.
Qazirgi kórsetkishter
2024 jyly:
Qazaqstannyń jalpy ishki ónimi — 288 mlrd dollar. Jan basyna shaqqanda — 14 myń dollardan asady. Halqy — 20,2 mln adam.
Ózbekstannyń JIÓ — 115 mlrd dollar. Jan basyna shaqqanda — 3092 dollar. Halqy — 37,2 mln adam.
Sarapshy Ózbekstannyń Qazaqstanmen ekonomikalyq turǵyda teńesýi úshin tek ýaqyt emes, sonymen qatar sapaly qurylymdyq reformalar men turaqty joǵary ósim qajet ekenin atap ótti.
