Daryo باسىلىمى بەلگىلى ەكونوميست بەحزود حوشيموۆتىڭ وزبەكستاننىڭ ەكونوميكالىق بولاشاعىنا قاتىستى پىكىرىن جاريالادى. ساراپشى ەلدىڭ قازىرگى دامۋ قارقىنىنا قاراپ، قازاقستانمەن سالىستىرعاندا ءجىو دەڭگەيىن قۋىپ جەتۋ وڭاي ماقسات ەمەس ەكەنىن اتاپ ءوتتى. Centralmedia24 اتالعان ماتەريالدىڭ اۋدارماسىن ۇسىندى، دەپ حابارلايدى Dalanews.kz.

قازاقستان مەن وزبەكستان اراسىنداعى الشاقتىق – 5-6 ەسە

ەكونوميستتىڭ ايتۋىنشا، ەكى ەلدىڭ جان باسىنا شاققانداعى جالپى ىشكى ءونىمى (ءجىو) اراسىندا ايىرماشىلىق 5-6 ەسەگە دەيىن ۇلكەن.

“قازىرگى ءوسىم قارقىنى ساقتالاتىن بولسا، وزبەكستانعا قازاقستان دەڭگەيىنە جاقىنداۋ ءۇشىن كەمىندە 30 جىل ۋاقىت قاجەت بولادى”، — دەيدى ول Cactuz اتتى YouTube-پودكاستىندا.

حوشيموۆ اتاپ وتكەندەي، دامىعان جانە دامۋشى ەلدەردىڭ ەكونوميكالىق وسۋىندەگى ايىرماشىلىق ايتارلىقتاي.

“ماسەلەن، اقش-تا جان باسىنا شاققانداعى ءجىو – 76 مىڭ دوللار. ونداعى جىلدىق ءوسىم 2 پايىز بولسا، بۇل شامامەن 1،5 مىڭ دوللار دەگەن ءسوز. ال وزبەكستاندا بۇل كورسەتكىش شامامەن 3 مىڭ دوللار. 5 پايىزدىق وسىممەن جان باسىنا شاققاندا بار بولعانى 150 دوللار قوسىلادى. باي مەن كەدەي ەلدەردەگى ءوسىم كولەمىنىڭ اراجىگى – وسىندا”، — دەيدى ەكونوميست.

جىلىنا 8-10 پايىزدىق ءوسىم بولماسا، ناتيجە جوق

ەكونوميكانىڭ ناقتى ىلگەرىلەۋى ءۇشىن وزبەكستاننىڭ جىلدىق ءوسىمى كەمىندە 8 پايىز بولۋى كەرەك. الايدا بەحزود حوشيموۆ بۇعان كۇمانمەن قارايتىنىن جاسىرمايدى.

“ءتىپتى جىل سايىن 5 پايىزدىق ءوسىم بولعاننىڭ وزىندە دە، قازاقستاندى قۋىپ جەتۋ وتە قيىن. ءبىز بۇگىنگى تاڭدا سونشالىقتى ارتتا قالىپ قويدىق، ولاردىڭ دەڭگەيىنە جەتۋ ءۇشىن ءاربىر وزبەك ازاماتىنىڭ تابىسى التى ەسە ءوسۋى قاجەت. ءبىراق بۇل وڭايلىقپەن شەشىلەتىن نارسە ەمەس. ونىڭ ۇستىنە، وزبەكستان ءتىپتى ورتا تابىستى ەلدەر قاتارىنا قوسىلا الا ما، جوق پا — بۇل دا كۇمان تۋدىراتىن ماسەلە”، – دەيدى حوشيموۆ.

قازىرگى كورسەتكىشتەر

2024 جىلى:

قازاقستاننىڭ جالپى ىشكى ءونىمى — 288 ملرد دوللار. جان باسىنا شاققاندا — 14 مىڭ دوللاردان اسادى. حالقى — 20،2 ملن ادام.

وزبەكستاننىڭ ءجىو — 115 ملرد دوللار. جان باسىنا شاققاندا — 3092 دوللار. حالقى — 37،2 ملن ادام.

ساراپشى وزبەكستاننىڭ قازاقستانمەن ەكونوميكالىق تۇرعىدا تەڭەسۋى ءۇشىن تەك ۋاقىت ەمەس، سونىمەن قاتار ساپالى قۇرىلىمدىق رەفورمالار مەن تۇراقتى جوعارى ءوسىم قاجەت ەكەنىن اتاپ ءوتتى.