Bul týraly Azattyq jazady.
Grek-rim kúresinen 59 keli salmaq dárejesi boiynsha kúresken 25 jastaǵy Elmurat Tasmuratov alǵashqy eki qarsylasyn ońai jeńdi.
Áýeli 2007 jylǵy álem chempionatynyń qola júldegeri serbiialyq Kristian Fristi 7:2, 2013 jylǵy álem chempiony soltústikkoreialyq balýan Iýn Von Chholdy 7:0 esebimen utty. Al jartylai finalda 2015 jylǵy álem chempiony kýbalyq Ismael Borrerodan jeńilip qaldy. Borrero Rioda altyn aldy. Tasmuratov qolaǵa talasta qyrǵyzstandyq Arsen Eralievten basym tústi.
"Qola alǵanyma óte qýanyshtymyn. Jospar boiynsha birinshi oryn alýym kerek edi. Olimpiada - óte qiyn jarys. Olimpiada aldynda tanystaryń “ jeńý kereksiń” dep ketedi. endi bireýler “sen myqtysyń” dep ketedi. Jankúier altyn kútip otyrady. Ózime tym senip qaldym-aý", - dep bastady áńgimesin balýan.
Grek-rim kúresinen bul salmaq dárejesinde Qazaqstan atynan Rio olimpiadasyna 29 jastaǵy Almat Kebispaev qatysty. Ol alǵashqy qarsylasy reseilik Ibragim Labazanovty jeńgenimen, ekinshi kezdesýde japoniialyq Shinobi Otadan jeńilip qaldy.
Kebispaevty jeńgen Ota finalǵa shyǵyp, ereje boiynsha Qazaqstan balýany qolaǵa talasýǵa múmkindik aldy. Ol alǵashqy kezdesýde London olimpidasynyń chempiony irandyq Hamid Soýriannan 0:7 esebimen jeńilip jatyp, sońǵy minýtta taza jeńiske jetti. Biraq kelesi kezdesýde daniialyq Stig Andre Vergeden jeńilip, júldesiz qaldy.
"Almatpen alǵashqy kezeńderde kezdeskim kelmedi. Jerebe tartylyp, ekeýmiz eki jaqqa túskende ishtei qýandym. Ol qola alyp ekeýmiz tuǵyrda qatar turǵanda keremet bolar edi. Rioǵa kelerde tús kórdim. Túsimde tý kóterip, kilemdi ainala júgirip júr ekenmin. Altyn medal bolar dep joryp edim, sál jetpei qaldy. Biraq túsim shyn bop shyqty. Eger olimpiadada qolaǵa talasta jeńilip qalsam ózimdi keshirmes edim", - deidi balýan.
«QAZAQSTANDA MÚMKINDIK BERMEDI»
Elmurat Tasmuratov Ózbekstannyń Tashkent oblysy Bostandyq aýdanynda týǵan. Jastaiynan kúres sektsiiasyna qatysqan. 8-cynyp bitirgen soń (2000-jyldardyń ortasy) ata-anasy ony tarihi otany - Qazaqstanǵa jiberedi. Ol Túrkistandaǵy sport mektep-internatynda oqidy. Túrkistan qalasy atynan Qazaqstandaǵy jasóspirimder arasyndaǵy jarystarǵa qatysqan.
"Qazaqstanda júrgende biraz jarystarda jeńdim. Biraq meni qysyp tastady. Jattyǵý jiyndaryna shaqyrmady. Esh múmkindik bolmady. Jastar arasyndaǵy Qazaqstan chempionatyna qatysyp, jeńilip qaldym. Sol jeńilisten keiin jattyǵý jiyndaryna shaqyrmaitynyn túsindim de Ózbekstanǵa oraldym", - deidi ol.
Ózbekstan úkimeti Elmuratqa olimpiadada qola júlde alǵany úshin 75 myń dollar beredi. Sportshy keleshekte 66 keli salmaq dárejesine aýysyp, Tokio olimpiadasyna qatysýdy josparlaidy.
"Ózbekstanda maǵan barlyq jaǵdai jasalǵan. Ata-anam da sonda. Jattyǵýymdy ýaqtyly jasap turamyn. Quramamen birge oqý-jattyǵýlarǵa shyǵamyn. Bastysy, jankúierlerimniń senimin aqtadym", - dedi júldeger.
Tasmuratov olimpiadaǵa deiin Ózbekstan quramasy sapynda Aziia chempionatynda - úsh altyn, álem chempionatynda eki ret qola medal alǵan. Ózbekstan quramasy Rio olimpiadasy qorytyndysy boiynsha, tórt altyn, eki kúmis, jeti qola júldemen Qazaqstannan bir saty joǵary - 21-oryn aldy.
Al Qazaqstannyń grek-rim kúresi sheberleri Rio Olimpiadasynda júldege ilikken joq.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
