بۇل تۋرالى ازاتتىق جازادى.
گرەك-ريم كۇرەسىنەن 59 كەلى سالماق دارەجەسى بويىنشا كۇرەسكەن 25 جاستاعى ەلمۇرات تاسمۇراتوۆ العاشقى ەكى قارسىلاسىن وڭاي جەڭدى.
اۋەلى 2007 جىلعى الەم چەمپيوناتىنىڭ قولا جۇلدەگەرى سەربيالىق كريستيان ءفريستى 7:2، 2013 جىلعى الەم چەمپيونى سولتۇستىككورەيالىق بالۋان يۋن ۆون چحولدى 7:0 ەسەبىمەن ۇتتى. ال جارتىلاي فينالدا 2015 جىلعى الەم چەمپيونى كۋبالىق يسماەل بوررەرودان جەڭىلىپ قالدى. بوررەرو ريودا التىن الدى. تاسمۇراتوۆ قولاعا تالاستا قىرعىزستاندىق ارسەن ەرالييەۆتەن باسىم ءتۇستى.
"قولا العانىما وتە قۋانىشتىمىن. جوسپار بويىنشا ءبىرىنشى ورىن الۋىم كەرەك ەدى. وليمپيادا - وتە قيىن جارىس. وليمپيادا الدىندا تانىستارىڭ “ جەڭۋ كەرەكسىڭ” دەپ كەتەدى. ەندى بىرەۋلەر “سەن مىقتىسىڭ” دەپ كەتەدى. جانكۇيەر التىن كۇتىپ وتىرادى. وزىمە تىم سەنىپ قالدىم-اۋ"، - دەپ باستادى اڭگىمەسىن بالۋان.
گرەك-ريم كۇرەسىنەن بۇل سالماق دارەجەسىندە قازاقستان اتىنان ريو وليمپياداسىنا 29 جاستاعى المات كەبىسپايەۆ قاتىستى. ول العاشقى قارسىلاسى رەسەيلىك يبراگيم لابازانوۆتى جەڭگەنىمەن، ەكىنشى كەزدەسۋدە جاپونيالىق شينوبي وتادان جەڭىلىپ قالدى.
كەبىسپايەۆتى جەڭگەن وتا فينالعا شىعىپ، ەرەجە بويىنشا قازاقستان بالۋانى قولاعا تالاسۋعا مۇمكىندىك الدى. ول العاشقى كەزدەسۋدە لوندون وليمپيداسىنىڭ چەمپيونى يراندىق حاميد سوۋرياننان 0:7 ەسەبىمەن جەڭىلىپ جاتىپ، سوڭعى مينۋتتا تازا جەڭىسكە جەتتى. ءبىراق كەلەسى كەزدەسۋدە دانيالىق ستيگ اندرە ۆەرگەدەن جەڭىلىپ، جۇلدەسىز قالدى.
"الماتپەن العاشقى كەزەڭدەردە كەزدەسكىم كەلمەدى. جەرەبە تارتىلىپ، ەكەۋمىز ەكى جاققا تۇسكەندە ىشتەي قۋاندىم. ول قولا الىپ ەكەۋمىز تۇعىردا قاتار تۇرعاندا كەرەمەت بولار ەدى. ريوعا كەلەردە ءتۇس كوردىم. تۇسىمدە تۋ كوتەرىپ، كىلەمدى اينالا جۇگىرىپ ءجۇر ەكەنمىن. التىن مەدال بولار دەپ جورىپ ەدىم، ءسال جەتپەي قالدى. ءبىراق ءتۇسىم شىن بوپ شىقتى. ەگەر وليمپيادادا قولاعا تالاستا جەڭىلىپ قالسام ءوزىمدى كەشىرمەس ەدىم"، - دەيدى بالۋان.
«قازاقستاندا مۇمكىندىك بەرمەدى»
ەلمۇرات تاسمۇراتوۆ وزبەكستاننىڭ تاشكەنت وبلىسى بوستاندىق اۋدانىندا تۋعان. جاستايىنان كۇرەس سەكسياسىنا قاتىسقان. 8-cىنىپ بىتىرگەن سوڭ (2000-جىلداردىڭ ورتاسى) اتا-اناسى ونى تاريحي وتانى - قازاقستانعا جىبەرەدى. ول تۇركىستانداعى سپورت مەكتەپ-ينتەرناتىندا وقيدى. تۇركىستان قالاسى اتىنان قازاقستانداعى جاسوسپىرىمدەر اراسىنداعى جارىستارعا قاتىسقان.
"قازاقستاندا جۇرگەندە ءبىراز جارىستاردا جەڭدىم. ءبىراق مەنى قىسىپ تاستادى. جاتتىعۋ جيىندارىنا شاقىرمادى. ەش مۇمكىندىك بولمادى. جاستار اراسىنداعى قازاقستان چەمپيوناتىنا قاتىسىپ، جەڭىلىپ قالدىم. سول جەڭىلىستەن كەيىن جاتتىعۋ جيىندارىنا شاقىرمايتىنىن ءتۇسىندىم دە وزبەكستانعا ورالدىم"، - دەيدى ول.
وزبەكستان ۇكىمەتى ەلمۇراتقا وليمپيادادا قولا جۇلدە العانى ءۇشىن 75 مىڭ دوللار بەرەدى. سپورتشى كەلەشەكتە 66 كەلى سالماق دارەجەسىنە اۋىسىپ، توكيو وليمپياداسىنا قاتىسۋدى جوسپارلايدى.
"وزبەكستاندا ماعان بارلىق جاعداي جاسالعان. اتا-انام دا سوندا. جاتتىعۋىمدى ۋاقتىلى جاساپ تۇرامىن. قۇرامامەن بىرگە وقۋ-جاتتىعۋلارعا شىعامىن. باستىسى، جانكۇيەرلەرىمنىڭ سەنىمىن اقتادىم"، - دەدى جۇلدەگەر.
تاسمۇراتوۆ وليمپياداعا دەيىن وزبەكستان قۇراماسى ساپىندا ازيا چەمپيوناتىندا - ءۇش التىن، الەم چەمپيوناتىندا ەكى رەت قولا مەدال العان. وزبەكستان قۇراماسى ريو وليمپياداسى قورىتىندىسى بويىنشا، ءتورت التىن، ەكى كۇمىس، جەتى قولا جۇلدەمەن قازاقستاننان ءبىر ساتى جوعارى - 21-ورىن الدى.
ال قازاقستاننىڭ گرەك-ريم كۇرەسى شەبەرلەرى ريو وليمپياداسىندا جۇلدەگە ىلىككەن جوق.
Copyright (c) 2013. RFE/RL، Inc. Reprinted with the permission of Radio Free Europe/Radio Liberty، 1201 Connecticut Ave.، N.W. Washington DC 20036.
