Tashkenttegi “tyńshy daýy” Ózbekstan men Reseidiń arasyndaǵy onsyzda shielenisken ahýaldy asqyndyra tústi dep habarlaidy Dalanews.kz.
Budan buryn Tashkentte memleketke opasyzdyq jasady degen kúdikpen saiasattanýshy, Ózbekstan prezidenti janyndaǵy strategiialyq zertteýler institýtynyń direktory Rafik Saifýlin jáne Ózbekstan Qarýly kúshteri Birlesken shtabynyń bastyǵy Akbar Iarbabaev quryqtalǵan. Bulardan bólek taǵy 10 áskeri (negizinen general jáne polkovnikter) qamaýǵa alynǵan.
[caption id="attachment_51237" align="aligncenter" width="474"]
Ózbek prokýratýrasy habarlaǵandai bular Máskeýdiń jansyzy bolǵan, memlekettik deńgeidegi málimetter men qupiialardy tikelei Kremlge jetkizgen, osy arqyly Mirziiaevtiń Máskeýge moiyn burmai ashyq saiasat júrgizýine kedergi keltirgen.
Kúdiktilerdiń kinási dáleldense 20 jylǵa deiin bas bostandyǵynan aiyrylady.
Aita ketelik byltyrǵy jyldyń 10 qazanynda Qazaqstanda shyǵystanýshy Konstantin Syroejkin memleketke opasyzdyq jasaǵany úshin kináli dep tanylyp, 10 jylǵa sottalǵan.
62 jastaǵy Syroejkin buǵan deiin Qazaqstan prezidenti janyndaǵy Qazaqstan strategiialyq zertteýler institýtynda bas ǵylymi qyzmetker bolyp jumys istegen...
…
“Tashkenttegi “tyńshy taýy” alyp aisbergtiń beti ǵana… Otanyna opasyzdyq jasady dep qamaýǵa alynǵan Saifýlin men Iarbabaevtyń arjaǵynda olardan da yqpaldy tulǵalar tur.
Bular Ózbekstan táýelsizdik alǵaly Máskeýge soiylyn soǵyp júr. Kremldegi Pýtinniń kabinetine Ózbekstannyń memlekettik deńgeidegi qupiialaryn habarlap ári Mirziiaevtiń Batyspen tyǵyz bailanys ornatýyna kedergi keltirip otyrǵan da solar. “Tyńshy daýynyń” arjaǵynda alapat kúsh jatyr…”, – deidi óz kezeginde ózbektiń eks-diplomaty Álisher Taksanov.
Onyń aitýynsha Ózbekstannyń Qarýly kúshteri men Qaýipsizdik qyzmetinde isteitin mamandardyń 50 paiyzy Reseide oqyp-toqyǵan.
Kópshiligi osy elmen tyǵyz bailanysty, ózinde jáne týys-týǵanynda Resei azamaty degen tólqujaty bar. Kúshtik qurylymdarda isteitin shendilerdiń kópshiligi kapitalyn Reseige aparyp jasyrady.
“Budan bólek Ózbekstandaǵy etnikalyq orystar Pýtinniń osyndaǵy aktivi ispettes. Reseilikterdiń kópshiligi Kreml basshysynyń qazirgi saiasatyna kóńili tolmaidy.
Ózbekstandaǵy orystar kerisinshe, Pýtinniń barsha bastamasyn qoldaidy jáne ony ózderiniń qorǵaýshysy ári tiregi dep esepteidi”, – deidi Taksanov.
Osy eldiń eks-Ádilet ministri Muhammad Malikovtiń aitýynsha Kremldiń yqpalynan arylý úshin ózbek biligi halyqaralyq sahnada ashyq saiasat ustanýǵa kóshken.
“Álbette, Ózbekstan áli de bolsa Reseige táýeldi. Ásirese gaz saýdasyna kelgende Pýtinniń aitqanyna kónýge týra keledi. Áitse de Máskeýden irgeni aýlaq salý keregin Mirziiaev baǵamdap otyr. Búgingi Resei kikiljińnen kóz ashar emes. Donbasstaǵy oqiǵalarǵa Siriiadaǵy soǵys qosamjarlandy, buǵan kúni keshe Belarýspen aradaǵy daýdy qosyńyz”, – deidi ol.
Onyń pikirinshe búgingi Reseimen senimge selkeý túsirmeitin uzaqmerzimdi bailanys ornatý neǵaibyl.
“Iá, dál solai. Osyny eskergen Mirziiaev kópvektorly, negizinen Batys pen AQSh-qa bet burǵan saiasatty ustanǵandy jón kórdi. Máskeýge táýeldiligimiz arta tússe, Pýtinniń tuzaǵyna túsýimiz múmkin.
Onyń ústine Pýtin ázir jalǵyz qaldy. Onyń odaqtasy joq dese de bolady. Amalsyzdan birkezderi KSRO quramynda bolǵan elderge arqa súiegisi keledi. Bulardyń arasynda Ózbekstan da bar.
Kreml basshysy Mirziiaev onyń aitqanyna erip, aidaýyna kónedi dep dámelenbesin. Mirziiaev Pýtinniń sózin sóilemeidi”, – deidi Taksanov.
Budan buryn ózbek basshysy Ózbekstannyń Eýraziialyq odaqqa qosylmaitynyn málimdegen.
– Bizdiń kóptegen azamattarymyz Qazaqsten men Reseige baryp jumys isteidi. Árine, buǵan bei-jai qarai almaitynymyz anyq. Biraq men bir jaitty ashyp aitaiyn, halyqtyń kókeiinde kúmán-kúdik bolmasyn.
Bizdi eshqandai el eshqashan táýelsizdikti aiyra almaidy. Táýelsizdik halyq senim artqan prezidenttiń qolynda.
Biz Eýraziialyq ekonomikalyq odaqqa múshe bolmaimyz, – degen edi Mirziiaev.
Ózbekstannyń burynǵy prezidenti Islam Kárimov te Reseimen alystan aralasqan ári Máskeýdiń ashý-yzasyn keltirgen áreketke barǵan.
Kárimov Ózbekstanda “Uly Otan soǵysy” degen keńestik túsinikti qoldanýǵa tyiym salyp, Jeńis kúniniń ataýyn Eske alý kúni dep ózgertken edi.
“Kárimov sonymen qatar bizdiń eldi Ujymdyq qaýipsizdik týraly shart uiymynan shyǵaryp aldy ári kirillitsanyń ornyna latyn álipbiin engizdi” deidi osy oraida eks-Ádilet ministri Muhammad Malikov
Dýman BYQAI
inozpress.kg, currenttime.tv aqparatynyń negizinde ázirlendi
