تاشكەنتتەگى “تىڭشى داۋى” وزبەكستان مەن رەسەيدىڭ اراسىنداعى ونسىزدا شيەلەنىسكەن احۋالدى اسقىندىرا ءتۇستى  دەپ حابارلايدى Dalanews.kz.

بۇدان بۇرىن تاشكەنتتە مەملەكەتكە وپاسىزدىق جاسادى دەگەن كۇدىكپەن ساياساتتانۋشى، وزبەكستان پرەزيدەنتى جانىنداعى ستراتەگيالىق زەرتتەۋلەر ينستيتۋتىنىڭ ديرەكتورى رافيك سايفۋلين جانە وزبەكستان قارۋلى كۇشتەرى بىرلەسكەن شتابىنىڭ باستىعى اكبار ياربابايەۆ قۇرىقتالعان. بۇلاردان بولەك تاعى 10 اسكەري (نەگىزىنەن گەنەرال جانە پولكوۆنيكتەر) قاماۋعا الىنعان.

[caption id="attachment_51237" align="aligncenter" width="474"] رافيك سايفۋلين[/caption]

وزبەك پروكۋراتۋراسى حابارلاعانداي بۇلار ماسكەۋدىڭ جانسىزى بولعان، مەملەكەتتىك دەڭگەيدەگى مالىمەتتەر مەن قۇپيالاردى تىكەلەي كرەملگە جەتكىزگەن، وسى ارقىلى ميرزيايەۆتىڭ ماسكەۋگە مويىن بۇرماي اشىق ساياسات جۇرگىزۋىنە كەدەرگى كەلتىرگەن.

كۇدىكتىلەردىڭ كىناسى دالەلدەنسە 20 جىلعا دەيىن باس بوستاندىعىنان ايىرىلادى. 

ايتا كەتەلىك بىلتىرعى جىلدىڭ 10 قازانىندا قازاقستاندا شىعىستانۋشى كونستانتين سىروەجكين مەملەكەتكە وپاسىزدىق جاساعانى ءۇشىن كىنالى دەپ تانىلىپ، 10 جىلعا سوتتالعان.

62 جاستاعى سىروەجكين بۇعان دەيىن قازاقستان پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىندا باس عىلىمي قىزمەتكەر بولىپ جۇمىس ىستەگەن...

…

“تاشكەنتتەگى “تىڭشى تاۋى” الىپ ايسبەرگتىڭ بەتى عانا… وتانىنا وپاسىزدىق جاسادى دەپ قاماۋعا الىنعان سايفۋلين مەن ياربابايەۆتىڭ  ارجاعىندا ولاردان دا ىقپالدى تۇلعالار تۇر.

بۇلار وزبەكستان تاۋەلسىزدىك العالى ماسكەۋگە سويىلىن سوعىپ ءجۇر. كرەملدەگى ءپۋتيننىڭ كابينەتىنە وزبەكستاننىڭ مەملەكەتتىك دەڭگەيدەگى قۇپيالارىن حابارلاپ ءارى ميرزيايەۆتىڭ باتىسپەن تىعىز بايلانىس ورناتۋىنا كەدەرگى كەلتىرىپ وتىرعان دا سولار. “تىڭشى داۋىنىڭ” ارجاعىندا الاپات كۇش جاتىر…”، – دەيدى ءوز كەزەگىندە وزبەكتىڭ ەكس-ديپلوماتى الىشەر تاكسانوۆ.

ونىڭ ايتۋىنشا وزبەكستاننىڭ قارۋلى كۇشتەرى مەن قاۋىپسىزدىك قىزمەتىندە ىستەيتىن مامانداردىڭ 50 پايىزى رەسەيدە وقىپ-توقىعان.

كوپشىلىگى وسى ەلمەن تىعىز بايلانىستى، وزىندە جانە تۋىس-تۋعانىندا رەسەي ازاماتى دەگەن ءتولقۇجاتى بار. كۇشتىك قۇرىلىمداردا ىستەيتىن شەندىلەردىڭ كوپشىلىگى كاپيتالىن رەسەيگە اپارىپ جاسىرادى.

“بۇدان بولەك وزبەكستانداعى ەتنيكالىق ورىستار ءپۋتيننىڭ وسىنداعى اكتيۆى ىسپەتتەس. رەسەيلىكتەردىڭ كوپشىلىگى كرەمل باسشىسىنىڭ قازىرگى ساياساتىنا كوڭىلى تولمايدى.

وزبەكستانداعى ورىستار كەرىسىنشە، ءپۋتيننىڭ بارشا باستاماسىن قولدايدى جانە ونى وزدەرىنىڭ قورعاۋشىسى ءارى تىرەگى دەپ ەسەپتەيدى”، – دەيدى تاكسانوۆ.

وسى ەلدىڭ ەكس-ادىلەت ءمينيسترى مۇحامماد ماليكوۆتىڭ ايتۋىنشا كرەملدىڭ ىقپالىنان ارىلۋ ءۇشىن وزبەك بيلىگى حالىقارالىق ساحنادا اشىق ساياسات ۇستانۋعا كوشكەن.

“البەتتە، وزبەكستان ءالى دە بولسا رەسەيگە تاۋەلدى. اسىرەسە گاز ساۋداسىنا كەلگەندە ءپۋتيننىڭ ايتقانىنا كونۋگە تۋرا كەلەدى. ايتسە دە ماسكەۋدەن ىرگەنى اۋلاق سالۋ كەرەگىن ميرزيايەۆ باعامداپ وتىر. بۇگىنگى رەسەي كيكىلجىڭنەن كوز اشار ەمەس. دونباسستاعى وقيعالارعا سيرياداعى سوعىس قوسامجارلاندى، بۇعان كۇنى كەشە بەلارۋسپەن اراداعى داۋدى قوسىڭىز”، – دەيدى ول.

ونىڭ پىكىرىنشە بۇگىنگى رەسەيمەن سەنىمگە سەلكەۋ تۇسىرمەيتىن ۇزاقمەرزىمدى بايلانىس ورناتۋ نەعايبىل.

“ءيا، ءدال سولاي. وسىنى ەسكەرگەن ميرزيايەۆ كوپۆەكتورلى، نەگىزىنەن باتىس پەن اقش-قا بەت بۇرعان ساياساتتى ۇستانعاندى ءجون كوردى. ماسكەۋگە تاۋەلدىلىگىمىز ارتا تۇسسە، ءپۋتيننىڭ تۇزاعىنا ءتۇسۋىمىز مۇمكىن.

ونىڭ ۇستىنە پۋتين ءازىر جالعىز قالدى. ونىڭ وداقتاسى جوق دەسە دە بولادى. امالسىزدان بىركەزدەرى كسرو قۇرامىندا بولعان ەلدەرگە ارقا سۇيەگىسى كەلەدى. بۇلاردىڭ اراسىندا وزبەكستان دا بار.

كرەمل باسشىسى ميرزيايەۆ ونىڭ ايتقانىنا ەرىپ، ايداۋىنا كونەدى دەپ دامەلەنبەسىن. ميرزيايەۆ ءپۋتيننىڭ ءسوزىن سويلەمەيدى”، – دەيدى تاكسانوۆ.

بۇدان بۇرىن وزبەك باسشىسى وزبەكستاننىڭ ەۋرازيالىق وداققا قوسىلمايتىنىن مالىمدەگەن.

– ءبىزدىڭ كوپتەگەن ازاماتتارىمىز قازاقستەن مەن رەسەيگە بارىپ جۇمىس ىستەيدى. ارينە، بۇعان بەي-جاي قاراي المايتىنىمىز انىق. ءبىراق مەن ءبىر جايتتى اشىپ ايتايىن، حالىقتىڭ كوكەيىندە كۇمان-كۇدىك بولماسىن.

ءبىزدى ەشقانداي ەل ەشقاشان تاۋەلسىزدىكتى ايىرا المايدى. تاۋەلسىزدىك حالىق سەنىم ارتقان پرەزيدەنتتىڭ قولىندا.

ءبىز ەۋرازيالىق ەكونوميكالىق وداققا مۇشە بولمايمىز،  – دەگەن ەدى ميرزيايەۆ.

وزبەكستاننىڭ بۇرىنعى پرەزيدەنتى يسلام كارىموۆ تە رەسەيمەن الىستان ارالاسقان ءارى ماسكەۋدىڭ اشۋ-ىزاسىن كەلتىرگەن ارەكەتكە بارعان.

كارىموۆ وزبەكستاندا “ۇلى وتان سوعىسى” دەگەن كەڭەستىك تۇسىنىكتى قولدانۋعا تىيىم سالىپ، جەڭىس كۇنىنىڭ اتاۋىن ەسكە الۋ كۇنى دەپ وزگەرتكەن ەدى.

“كارىموۆ سونىمەن قاتار ءبىزدىڭ ەلدى ۇجىمدىق قاۋىپسىزدىك تۋرالى شارت ۇيىمىنان شىعارىپ الدى ءارى كيريلليسانىڭ ورنىنا لاتىن ءالىپبيىن ەنگىزدى” دەيدى وسى ورايدا ەكس-ادىلەت ءمينيسترى مۇحامماد ماليكوۆ

دۋمان بىقاي

 inozpress.kg، currenttime.tv اقپاراتىنىڭ نەگىزىندە ازىرلەندى