Yqylym zamandardan beri qazaq órkenietiniń altyn dińgegine balanǵan Otyrar aýdanynyń 150-ge jýyq ónerpazdary túrki dúniesiniń altyn besigi – rýhani astanaǵa óner sálemimen keldi.
Onyń ishinde sýretshi Ádilhan Máliktiń Otyrar jaily 30 tarihi týyndysy men belgili gobelenshi Baqyt Amangeldievtiń 20-ǵa jýyq jumystary, qolóner sheberi Januzaq Erimbetovtiń saz balshyqtan jasaǵan qumyralary, aq jaýlyqty ájelerdiń quraq kórpesheleri men jastyqtary syndy túrli oiýly buiymdar da bar.
Sonymen qatar, aýdannyń býrasan, apaitós balýandary kúsh synasyp, arqan tartý, láńgi tebý, asyq atý syndy ulttyq sport túrlerinen saiys uiymdastyrdy.
Túrkistan aspanyn áýelegen ánmen kómkergen kontserttik baǵdarlamany QR mádeniet qairatkeri Hadisha Shalabaeva «Otyrardaǵy toi» ánimen ashsa, belgili ánshi-sazger Berik Seksenbekuly óz shyǵarmashylyǵynan «Túrkistanym», «Sháýildir keshi» syndy ánderdi oryndady.
Dástúrli ánshilerdiń án sherýi, halyq aspaptar orkestriniń oryndaýyndaǵy tamyljyǵan kúiler, aýdan ónerpazdarynyń ánderi men myń buralǵan bileri merekelik keshti jandandyrsa, túrkistandyqtarǵa kóterińki kóńil-kúi syilaǵan merekelik-sazdy baǵdarlama jastardyń áýezdi keshimen jalǵasty.
