ەلباسىمىز نۇرسۇلتان نازاربايەۆتىڭ جارلىعىمەن تۇركى حالىقتارى ءۇشىن قاسيەتتى مەكەن تۇركىستان قالاسىنىڭ وبلىس ورتالىعى بولعاندا بارشا قازاق بالاسى قۋانعانى انىق. ءوز كەزەگىندە وبلىسى اكىمى جانسەيىت تۇيمەبايەۆ تۇركىستان قالاسىندا وبلىسىمىزدىڭ اۋدان، قالالارى «تۇركىستانعا سالەم» اتتى مەرەكەلىك-كونسەرتتىك باعدارلامالارىن ۇسىنعان بولاتىن. وسى باستامانىڭ اياسىندا وتىرار اۋدانىنىڭ ونەر جۇلدىزدارى تۇركىستانعا ارنايى بارىپ، ءوز ونەرلەرىن كورسەتىپ قايتتى.

ىقىلىم زامانداردان بەرى قازاق وركەنيەتىنىڭ التىن دىڭگەگىنە بالانعان وتىرار اۋدانىنىڭ 150-گە جۋىق ونەرپازدارى تۇركى دۇنيەسىنىڭ التىن بەسىگى – رۋحاني استاناعا ونەر سالەمىمەن كەلدى.

وبلىس ورتالىعىنداعى مەرەكەلىك شارادا وتىرارلىق قولونەر شەبەرلەرى ءتول ونەرىمىزدەن شەبەرلىك ساباقتارىن كورسەتىپ، كورمەگە قويىلعان 200-دەن اسا تۋىندىلارىن تانىستىردى.

ونىڭ ىشىندە سۋرەتشى ءادىلحان مالىكتىڭ وتىرار جايلى 30 تاريحي تۋىندىسى مەن بەلگىلى گوبەلەنشى باقىت امانگەلدييەۆتىڭ 20-عا جۋىق جۇمىستارى، قولونەر شەبەرى جانۇزاق ەرىمبەتوۆتىڭ ساز بالشىقتان جاساعان قۇمىرالارى، اق جاۋلىقتى اجەلەردىڭ قۇراق كورپەشەلەرى مەن جاستىقتارى سىندى ءتۇرلى ويۋلى بۇيىمدار دا بار.

سونىمەن قاتار، اۋداننىڭ بۋراسان، ءاپايتوس بالۋاندارى كۇش سىناسىپ، ارقان تارتۋ، لاڭگى تەبۋ، اسىق اتۋ سىندى ۇلتتىق سپورت تۇرلەرىنەن سايىس ۇيىمداستىردى.

تۇركىستان اسپانىن اۋەلەگەن انمەن كومكەرگەن كونسەرتتىك باعدارلامانى ق ر مادەنيەت قايراتكەرى حاديشا شالابايەۆا «وتىرارداعى توي» انىمەن اشسا، بەلگىلى انشى-سازگەر بەرىك سەكسەنبەك ۇلى ءوز شىعارماشىلىعىنان «تۇركىستانىم»، «ءشاۋىلدىر كەشى» سىندى اندەردى ورىندادى.

ءداستۇرلى انشىلەردىڭ ءان شەرۋى، حالىق اسپاپتار وركەسترىنىڭ ورىنداۋىنداعى تامىلجىعان كۇيلەر، اۋدان ونەرپازدارىنىڭ اندەرى مەن مىڭ بۇرالعان بيلەرى مەرەكەلىك كەشتى جانداندىرسا، تۇركىستاندىقتارعا كوتەرىڭكى كوڭىل-كۇي سىيلاعان مەرەكەلىك-سازدى باعدارلاما جاستاردىڭ اۋەزدى كەشىمەن جالعاستى.