Saltanatty sharaǵa Túrkistan oblysy ákiminiń orynbasary Tólegen Sársembaev pen Otyrar aýdanynyń ákimi Erlan Aitahanov, aýdannyń ziialy qaýym ókilderimen batyr S.Áshirovtyń jubaiy qatysyp, lentasyn qidy.Otyrar aýdanyn Syrdariia men Arys ózeni kesip ótedi. Qazaq aqyndarynyń jyryna arqaý, kompozitorlardyń shabytyn qozǵap ánge ainalǵan qos ózen otyrarlyqtardyń maqtanyshy. Sháýildirdi aralap ótip, Dariiaǵa quiatyn Arys ózeniniń jaǵalaýyn abattandyrý jumysy aiaqtalyp, turǵyndardyń demalys aimaǵyna ainaldy.
– Búgin biz 16 jeltoqsan – Qazaqstan Respýblikasynyń Táýelsizdik kúni qarsańynda saltanatty túrde ashyp tyrǵan memorialdyq keshen – qan maidanda tolarsaqtan saz kezken maidargerlerge qurmet dep bilemiz. Ótkenimizge sheginip qaraityn bolsaq, 1945 jyly adamzat tarihynda eń aýyr jáne qandy soǵystyń sońǵy oqtary atyldy. Sol bir surapyl jyldarda 3000-nan astam otyrarlyqtar maidan dalasyna attanyp, 2466 bozdaq týǵan jerge oralmady. Olardyń esimderi men erlikteri eshqashan umytylmaidy. Al elge aman esen oralǵan keshegi maidanger, búgingi ardagerlerimiz elimiz ben týǵan ólkemizdiń igiligine adal eńbek etýdiń ónegesin kersete aldy. Olai bolsa, olardyń bizdiń Otanymyzdyń bostandyǵy men táýelsizdigi jolyndaǵy teńdessiz erlikteri men tabandylyqtary, eren eńbekteri ǵasyrlar boiy jasai beredi. Bul kúnderi sol eskirmes estelikter, kózi tiri ardager – aqsaqaldardyń júregin mazalasa, sum soǵys salǵan qandy qyrǵyn jaily tek ardagerler aýzynan estip bilgen keiingi jastardyń da janyn tolqytady. Otanǵa, týǵan jerge, elge degen súiispenshilik myńdaǵan qazaqstandyqtardyń tula boiynan jalyndap turdy. Búgingi ardager – keshegi jaýynger. Ol kezde nebári 19-20 jastaǵy azamattar ata-babasynyń batyldyǵyn, batyrlyǵyn, erjúrektigin boiyna sińirip ósken qazaq jaýyngerleri, batyr aǵalarymyz, jastyǵyna qaramai bir qiyrda jan alysyp, jan berisip, keskilesken urystarǵa qatysyp, keremet erlikter jasady. Barshańyzdy El Táýelsizdiginiń 27 jyldyǵymen jáne búgingi tarihi nysandardyń ashylýymen quttyqtaimyn! – dedi oblys ákiminiń orynbasary Tólegen Sársembaev.
Nysannyń maqsaty – ózen jaǵalaýyn sýdyń buzýynan saqtaý, ári jaiaý júrginshiler serýendeitin saiabaq salyp aýdan turǵyndary jadyna máńgilik tarihi tulǵalar beinesin dáripteý bolyp tabylady.
– «Arys jaǵalaýy» saiabaǵy tórinde otyrarlyq qos qaharman, Keńes Odaǵynyń batyrlary Seiitqasym Áshirov pen Temirbek Ibragimovtardyń at ústindegi eskertkishteri ornatylǵan. Al eskertkishti ainala ekinshi dúniejúzilik soǵysyna attanǵan 3866 otyrarlyq maidangerdiń esimderi mármár taqtaǵa oiylyp jazylǵan. Qos batyrdyń biri jaiaý ásker qatarynda, ekinshisi barlaýshy bolyp maidanǵa kirgen. Eskertkishtegi batyrlardyń at ústinde jasalý sebebi, erjúrek babalarymyz ǵasyrlar boiy syrtqy jaýyna at ústinde júrip toitarys berip elin, jerin qorǵaǵan. Otyrarlyq qos batyrymyz uly babalardyń urpaǵy, ári zańdy jalǵasy. Elbasymyz Nursultan Ábishuly Nazarbaevtyń «Uly dalanyń jeti qyry» atty maqalasynda da atqa miný mádenieti týraly airyqsha sózi bar. Jaý júrek babalar bizdiń maqtanyshymyz, urpaqtyń maqtanyshy. Olardyń esimderi máńgilik el esinde saqtala bermek, – dedi aýdan ákimi Erlan Aitahanov.
Saltanatty jiynnan soń Otan úshin ot keship, qurban bolǵan bozdaqtarǵa arnap as berilip, Quran baǵyshtaldy.
Otyrar aýdany ákiminiń baspasóz qyzmeti
