"Otbasy bank" óz qyzmetkerleriniń zańsyz syiaqy alǵan birneshe deregin anyqtady. Olar klientter men rieltorlarǵa kómektesip, turǵyn úi kezegin alǵa jyljytqany úshin aqsha alǵan. Bank bul faktilerdi jasyrmai, quqyq qorǵaý organdaryna aryz túsirgen. Qazir birneshe qylmystyq is tergelip jatyr, dep habarlaidy dalanews.kz.
Banktiń esebine sáikes, zańsyz syiaqy alý derekteri 2025 jyly anyqtalǵan. Keibir qyzmetkerler klienttermen qatar rieltorlardyń, notariýstar men jeke sot oryndaýshylarynyń múddesin qorǵap, olardyń máselesin sheshý úshin aqsha alǵan.
"2025 jyly klientterdiń, rieltorlardyń, jeke sot oryndaýshylary men notariýstardyń múddesin ilgeriletý, turǵyn úi kezegin jyljytý úshin zańsyz syiaqy alǵan bank qyzmetkerleri anyqtaldy", - delingen esepte.
Taǵy bir zańbuzýshylyq banktiń filialdarynyń birinde tirkelgen. Qyzmetker nesie alǵysy kelgen azamattardyń tabysyn joǵary etip kórsetý úshin jalǵan anyqtamalar daiyndaǵan. Bul qujattar klientterdiń tólem qabiletin rastaý úshin nesie ótinimderine qosylǵan.
Atalǵan faktilerge qatysy bar qyzmetkerler jumystan shyǵaryldy. Bank olarmen eńbek shartyn «senimnen aiyrylýyna bailanysty» toqtatqan. Al jinalǵan materialdar quqyq qorǵaý organdaryna berilip, tergeý bastalǵan.
