Otbasy bank ipoteka rásimdeý kezinde kepilge qabyldanatyn turǵyn úige qoiylatyn talaptardy jeńildetip, paneldi úilerdiń paidalaný merzimine qatysty shekteýdi ulǵaitty, dep habarlaidy dalanews.kz.
Bank málimetinshe, endi beton jáne keramzitbeton negizindegi panelderden salynǵan, paidalanýǵa berilgenine 60 jyldan aspaǵan turǵyn úiler kepil retinde qabyldanady.
Buǵan deiin Otbasy bank paneldi úilerdiń paidalaný merzimi 50 jyldan aspaǵan jaǵdaida ǵana ipoteka beretin. Jańa talapqa sáikes, 1966 jyldan beri salynǵan paneldi úilerdegi páterler de bank talaptaryna sai keledi.
Sonymen qatar bank alǵash ret SIP-panelderden salynǵan jeke turǵyn úilerdi kepilge qabyldai bastady.
Alaida mundai úilerge birqatar talap qoiylady. Atap aitqanda, olardyń paidalanýǵa berilgenine bes jyldan aspaýy, sertifikattalǵan materialdardan salynýy, irgetasy berik bolýy, ishki jáne syrtqy árleý jumystary tolyq aiaqtalýy jáne barlyq injenerlik kommýnikatsiialarǵa qosylýy tiis.
Sarapshylardyń pikirinshe, engizilgen ózgerister qaitalama turǵyn úi naryǵyndaǵy ipoteka arqyly satyp alýǵa bolatyn baspanalardyń sanyn kóbeitip, azamattardyń tańdaý múmkindigin keńeitedi.
