Otbasy bank salymshylarynyń depozitteri endi esepten shyǵarýǵa jáne buǵattaýǵa jatpaidy. Jaqynda bank salymdaryn qorǵaýdy kózdeitin "Turǵyn úi qurylysyna, avtomobil joldaryna úlestik qatysý jáne múgedek adamdardy tasymaldaý boiynsha qyzmetter kórsetý máseleleri boiynsha keibir zańnamalyq aktilerge ózgerister men tolyqtyrýlar engizý týraly" Zańǵa Prezident qol qoidy, dep habarlaidy Dalanews.kz.
Endi Otbasy banki salymdary úshinshi tulǵalardyń talap-aryzynan qorǵalatyn bolady:
- Otbasy banki salymshylarynyń depozitterindegi biryńǵai zeinetaqy tólemi;
- aralyq jáne aldyn ala zaemdar boiynsha kepil retinde áreket etetin depozitter.
"Bul sot oryndaýshylarynyń kreditorlar usynǵan notariýstyń atqarýshylyq jazbasy arqyly talap qoiýy boiynsha buǵattaýdy nemese olardan qarajatty májbúrlep esepten shyǵarýdy júrgize almaitynyn bildiredi", dep túsindiredi banktegiler.
"Buryn kepildegi depozitterden sot oryndaýshylary qarajatty esepten shyǵaryp alǵanda bank klientteri aralyq nemese aldyn ala zaemdardy ýaqytynda jaba almai jáne turǵyn úi zaemyna merzimine sai kóshe almai qalatyn. Bul óz kezeginde otbasyǵa túsetin boryshtyq júktemeni de arttyratyn. Úshinshi tulǵalardyń talaby boiynsha depozitterden aqshany esepten shyǵarý salymshynyń turǵyn úi jaǵdaiyn jaqsartýǵa da kedergi keltiretin", - deidi Otbasy bankindegiler.
Otbasy bank salymshylarynyń depozitterin qorǵaý qazaqstandyqtardyń jinaǵyn saqtaýǵa, baspanasynan aiyrylýǵa jol bermeýge jáne turǵyn úi qurylysy jinaqtary júiesiniń turaqtylyǵyn qamtamasyz etýge kómektesedi, dep atap ótti qarjy institýty.
Otbasy banki Basqarma tóraǵasynyń orynbasary Nurlan Aqshanovtyń aitýynsha, búginderi Otbasy bankinde 3,2 mln qazaqstandyq óz baspanasyna qarajat jinaýda. 2025 jyldyń alty aiy ishinde depozitter boiynsha tartylǵan aqsha kólemi 546 mlrd teńgeni qurady. Bul - ótken jyldyń osyndai kezeńimen salystyrǵanda 39%-ǵa kóp kólem. Jumys isteitin árbir úshinshi qazaqstandyq Otbasy bankinde depozitte aqsha ustaidy.
Esterińizge sala keteiik, buǵan deiin 2 shildeden bastap Otbasy bankindegi aldyn ala jáne aralyq turǵyn úi zaemdaryn merziminen buryn tolyq óteý erejelerine qatysty qabyldanǵan ózgerister óz kúshine engeni habarlanǵan bolatyn.
Endi joǵaryda kórsetilgen zaemdardy merziminen buryn japqan jaǵdaida:
- zaemmen bailanysty depozittegi jinaqtar avtomatty túrde negizgi boryshtyń qaldyǵyn óteýge baǵyttalatyn bolady;
- turǵyn úi qurylysy jinaqtary týraly shart mindetti túrde toqtatylyp, buzýǵa jatqyzylady;
- jańa zaemdy rásimdeý úshin jańa depozit ashý ne buryn berilgen zaemǵa bailanbaǵan qoldanystaǵysyn paidalaný talap etiledi.
