وتباسى بانك سالىمشىلارىنىڭ دەپوزيتتەرى ەندى ەسەپتەن شىعارۋعا جانە بۇعاتتاۋعا جاتپايدى. جاقىندا بانك سالىمدارىن قورعاۋدى كوزدەيتىن "تۇرعىن ءۇي قۇرىلىسىنا، اۆتوموبيل جولدارىنا ۇلەستىك قاتىسۋ جانە مۇگەدەك ادامداردى تاسىمالداۋ بويىنشا قىزمەتتەر كورسەتۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى" زاڭعا پرەزيدەنت قول قويدى، دەپ حابارلايدى Dalanews.kz.
ەندى وتباسى بانكى سالىمدارى ءۇشىنشى تۇلعالاردىڭ تالاپ-ارىزىنان قورعالاتىن بولادى:
- وتباسى بانكى سالىمشىلارىنىڭ دەپوزيتتەرىندەگى ءبىرىڭعاي زەينەتاقى تولەمى؛
- ارالىق جانە الدىن الا زاەمدار بويىنشا كەپىل رەتىندە ارەكەت ەتەتىن دەپوزيتتەر.
"بۇل سوت ورىنداۋشىلارىنىڭ كرەديتورلار ۇسىنعان نوتاريۋستىڭ اتقارۋشىلىق جازباسى ارقىلى تالاپ قويۋى بويىنشا بۇعاتتاۋدى نەمەسە ولاردان قاراجاتتى ماجبۇرلەپ ەسەپتەن شىعارۋدى جۇرگىزە المايتىنىن بىلدىرەدى"، دەپ تۇسىندىرەدى بانكتەگىلەر.
"بۇرىن كەپىلدەگى دەپوزيتتەردەن سوت ورىنداۋشىلارى قاراجاتتى ەسەپتەن شىعارىپ العاندا بانك كليەنتتەرى ارالىق نەمەسە الدىن الا زاەمداردى ۋاقىتىندا جابا الماي جانە تۇرعىن ءۇي زاەمىنا مەرزىمىنە ساي كوشە الماي قالاتىن. بۇل ءوز كەزەگىندە وتباسىعا تۇسەتىن بورىشتىق جۇكتەمەنى دە ارتتىراتىن. ءۇشىنشى تۇلعالاردىڭ تالابى بويىنشا دەپوزيتتەردەن اقشانى ەسەپتەن شىعارۋ سالىمشىنىڭ تۇرعىن ءۇي جاعدايىن جاقسارتۋعا دا كەدەرگى كەلتىرەتىن"، - دەيدى وتباسى بانكىندەگىلەر.
وتباسى بانك سالىمشىلارىنىڭ دەپوزيتتەرىن قورعاۋ قازاقستاندىقتاردىڭ جيناعىن ساقتاۋعا، باسپاناسىنان ايىرىلۋعا جول بەرمەۋگە جانە تۇرعىن ءۇي قۇرىلىسى جيناقتارى جۇيەسىنىڭ تۇراقتىلىعىن قامتاماسىز ەتۋگە كومەكتەسەدى، دەپ اتاپ ءوتتى قارجى ينستيتۋتى.
وتباسى بانكى باسقارما ءتوراعاسىنىڭ ورىنباسارى نۇرلان اقشانوۆتىڭ ايتۋىنشا، بۇگىندەرى وتباسى بانكىندە 3،2 ملن قازاقستاندىق ءوز باسپاناسىنا قاراجات جيناۋدا. 2025 جىلدىڭ التى ايى ىشىندە دەپوزيتتەر بويىنشا تارتىلعان اقشا كولەمى 546 ملرد تەڭگەنى قۇرادى. بۇل - وتكەن جىلدىڭ وسىنداي كەزەڭىمەن سالىستىرعاندا 39%-عا كوپ كولەم. جۇمىس ىستەيتىن ءاربىر ءۇشىنشى قازاقستاندىق وتباسى بانكىندە دەپوزيتتە اقشا ۇستايدى.
ەستەرىڭىزگە سالا كەتەيىك، بۇعان دەيىن 2 شىلدەدەن باستاپ وتباسى بانكىندەگى الدىن الا جانە ارالىق تۇرعىن ءۇي زاەمدارىن مەرزىمىنەن بۇرىن تولىق وتەۋ ەرەجەلەرىنە قاتىستى قابىلدانعان وزگەرىستەر ءوز كۇشىنە ەنگەنى حابارلانعان بولاتىن.
ەندى جوعارىدا كورسەتىلگەن زاەمداردى مەرزىمىنەن بۇرىن جاپقان جاعدايدا:
- زاەممەن بايلانىستى دەپوزيتتەگى جيناقتار اۆتوماتتى تۇردە نەگىزگى بورىشتىڭ قالدىعىن وتەۋگە باعىتتالاتىن بولادى؛
- تۇرعىن ءۇي قۇرىلىسى جيناقتارى تۋرالى شارت مىندەتتى تۇردە توقتاتىلىپ، بۇزۋعا جاتقىزىلادى؛
- جاڭا زاەمدى راسىمدەۋ ءۇشىن جاڭا دەپوزيت اشۋ نە بۇرىن بەرىلگەن زاەمعا بايلانباعان قولدانىستاعىسىن پايدالانۋ تالاپ ەتىلەدى.
