Marafon boıy áleýmettik jelilerdegi NIS-tiń Uly Jeńiske arnalǵan onlaın formatta maıdan jáne tyl ardagerlerimen kezdesý, «Uly Jeńiske taǵzym» erlik sabaqtary ótip, «Meniń otbasymnyń ardager batyry» zertteý jobalarynyń qorytyndysy jarıalandy. Qashyqtan «Ol kúnderdiń dańqy óshpeıdi» án chellendji, «Men batyrdyń urpaǵymyn» art chellendji, «Uly Jeńisti jyrlaımyz» kórkemsóz oqýlary kóptiń qyzyǵýshylyǵyn týdyrdy.
Ár mektepte oqýshylar otbasy muraǵatynda saqtalǵan maıdan hattary men sýretterin kórsetken «Soǵys týraly monolog», «Maıdannan hat», «Otty jyldar jańǵyryǵy – otbasymda» derekti fılmderi daıyndaldy. Qazaqstannyń túkpir-túkpirindegi soǵysqa qatysty jeke muraǵattar kóterildi. Dala poshtasynan joldanǵan árbir sarǵaıǵan úshburysh hatta beıbit ómir týraly armandar men josparlar, úı ishi jáne jan dostarmen habar almasý, týǵan jerine degen saǵynysh jatyr.
Nur-Sultan qalasy fızıka-matematıka baǵytyndaǵy Nazarbaev Zıatkerlik mektebiniń oqýshysy Damır Bekenovtiń atasy Qadan Bekenov Berlındi alýǵa qatysqan. Qaraǵandy qalasyndaǵy NZM-nen Mıras Daýytqazynyń atasy, áskerı dáriger Shárip Seksenov maıdan dalasynda 15 500-den astam ota jasapty.Óskemendik zıatker Aldıar Aýbakırovtyń atasy Mahmet Qaıyrbaevqa Keńes Odaǵynyń Batyry ataǵy berildi. Taraz qalasyndaǵy Nazarbaev Zıatkerlik mektep muǵalimi Elmıra Akımovanyń ákesi, ustaz Tursyn Akımov sum soǵys bastalysymen óz erkimen maıdanǵa attanǵan. Almatylyq hımıa-bıologıa baǵytyndaǵy mekteptiń oqýshysy Bogdan Mıronovtyń atasy Grıgorıı Mıronov Ladoga kóliniń áıgili «Ómir jolymen» Lenıngrad blokadasyna azyq-túlik jetkizgen. Qostanaıdaǵy Zıatkerlik mektep oqýshylary Dıar men Sanjar Kýstavletovter atasy Abdrahman Kýstavletov óziniń uly Ahmetbekti atqyshtar mektebinde kezdestirgen týraly estelik saqtalǵanyn aıtady. Elordadaǵy fızıka-matematıka baǵytyndaǵy Zıatkerlik mektepten Batyrhan Sarsenovtyń atasy Shamsýtdın Sarsenov keńes barlaýshylary quramynda Tegeran konferensıasynda «Úlken Úshtik» kóshbasshylarynyń qaýipsizdigin qamtamasyz etti. «Bilimge umtylyńyzdar!» – shymkenttik fızıka-matematıka baǵytyndaǵy mektep oqýshysy Abylaı Keńestiń atasy Anas Alımov nemerelerine osyndaı ósıet qaldyrdy. Jeńis marafony kezinde otbasy muraǵatyndaǵy áserli, jan teberinter júzdegen biregeı oqıǵa baıandaldy.
Soǵys jyldarynda Oral qalasynyń úsh aerodromynan áıgili ushqyshtar Hıýaz Dospanova men Leonıd Beda áýege kóterilgen, biriniń ornynda qazir Nazarbaev Zıatkerlik mektebi boı kótergen. Densaýlyǵyna baılanysty maıdan qataryna alynbaǵan Ádilbek Demesinov bar múlkine áskerı ushaq satyp alyp, tylda naǵyz erligimen tanylǵan.
Ivan Sýsanın atyndaǵy kostromalyq murajaıda 53-shi Sýsanın retinde Baıshyǵan Bekturlıev aty tur, onyń erliginiń arqasynda Qazaqstannyń batysynda Gýrev munaı óńdeý zaýytyna bara jatqan jaý desanty joıylǵan, aty ańyzǵa aınalǵan aqsaqal – oraldyq Zıatkerlik mektep oqýshylary Álı men Mereı Esengeldınderdiń atasy. 9 mamyr kúni pavlodarlyq zıatker Arýjan Halyqovanyń apasy, tyl ardageri Kúljaýpar Qojanovaǵa Reseı Federasıasynyń Prezıdenti Vladımır Pýtın atynan «Uly Otan soǵysyndaǵy Jeńiske 75 jyl» mereıtoılyq medali tabystaldy. Qaraǵandy qalasyndaǵy Nazarbaev Zıatkerlik mektebiniń «Meıirimdilik kópiri» eriktiler klýby júrgizgen áleýmettik-zertteý qorytyndysy boıynsha «Meniń taǵdyrymdaǵy soǵystyń qaldyrǵan izderi» atty jınaǵy jaryq kórdi. Oraldaǵy Nazarbaev Zıatkerlik mektebinde ótken «Kesteli oramal» aksıasy kezinde oqýshylar men muǵalimder soǵys pen tylda ter tókken ardager týystarynyń atyn kestelep jazdy. Jeńiske 75 jyl tolǵanda Aqtaý qalasyndaǵy Nazarbaev Zıatkerlik mektebiniń muǵalimi Svetlana Ozgan áriptesteriniń kómegimen atasy Ozgan Kosanovtyń jerlengen jerin tapty, otbasy bul izdeýdi 1943 jyly bastaǵan eken.
Júzdegen áńgimeler men fılmder, maıdan hattary men sýretter – barlyǵy da Uly soǵystyń jáne onyń maıdany men tylynda erlik kórsetken eń jaqyn adamdardyń shynaıy ári egjeı-tegjeıli kelbeti, al ondaǵy keıipkerlerdiń aty marafonǵa qatysýshylardyń maqtan tutar tegine aınalǵan. Estelikter lentasynda oqýshylar Jeńis kúnin nelikten kózdi jasqa toltyra toılaıtyn mereke ekenin túsingenderin, maıdan hattary men sýretter, jerleý týraly habarlamalar, orden kitapshalary, áskerı marapattar, ardagerlerdiń qol saǵattary – árbir qazaqstandyq otbasy úshin qundy jádigerler ekenine kóz jetkizgenderin moıyndady.
«Otan úshin ot keshken batyrdyń biz urpaǵymyz!» marafony Nazarbaev Zıatkerlik mektepteriniń barlyq oqýshylary úshin erlik pen otansúıgishten syr shertken shynaıy sabaqqa aınaldy. Qazirgi tańda NIS jelisinde elektrondy «Estelikter muraǵatyn» jasaý qolǵa alynǵan. Aıtýly marafondy dástúrli túrde jyl saıyn mamyrdyń birinshi onkúndiginde ótkizý josparlanyp otyr.
