Oblys ortalyǵynda «Oskemen Open-2024» atty halyqaralyq shahmat týrniri bastaldy. Shyǵysta tuńǵysh ret uiymdastyrylyp otyrǵan jarysqa 15 eldiń belgili grossmeisterleri qatysýda, dep habarlaidy Dalanews.kz Altainews.kz-ke silteme jasap.
Kil myqtylar baq synaityn týrnir KazChess/Qazaqstan shahmat federatsiiasy men Shyǵys Qazaqstan oblysy ákimdiginiń muryndyq bolýymen ótýde.
Toǵyz kúnge sozylatyn jarys shveitsariialyq júie boiynsha ótetinin aitý kerek. Uiymdastyrýshylardyń aqparatynsha, jarys eki týrnirden quralady. Máselen, «Masters» týrnirine reitingi 1 900-den tómen emes 15 eldiń 120-dan astam sportshysy qatyssa, «Open» jarysynda reitingisi 2 100-den aspaityn 74 oiynshy ózara myqtyny anyqtaidy.
– Biz úlken shahmat týrnirin ótkizýdi Astana men Almaty siiaqty megapolister úshin ǵana emes, elimizdiń barlyq aimaqtary úshin qalypty nársege ainaldyrýǵa umtylamyz. Ashyq týrnir seriiasyn ótkizip jatqanymyz da sondyqtan. Búgingi jarysqa álemniń úzdik shahmatshylaryn shaqyrdyq. Ondaǵy maqsat – jergilikti oiynshylardyń úzdiktermen oinap, tájiribe jinaqtaýyna, sondai-aq otandastarymyzdyń shahmat sportyna degen qyzyǵýshylyǵyn arttyrýǵa jaǵdai jasaý. Bizge qoldaý bildirip jatqan oblys basshylyǵyna, sondai-aq biznes qaýymdastyqqa airyqsha alǵys aitamyz, – dedi Qazaqstan shahmat federatsiiasynyń atqarýshy direktory Gúlmira Dáýletova.
Aita keter jait, halyqaralyq shahmat týrniriniń ashylý saltanaty D.Serikbaev atyndaǵy ShQTÝ ǵimaratynda uiymdastyryldy, aldaǵy shahmat básekeleri de dál sol jerde ótpek. Ashylý saltanatynyń qurmetti qonaqtary bolǵan Shyǵys Qazaqstan oblysy ákiminiń orynbasary Baqytjan Baiahmetov, Qazaqstan shahmat federatsiiasynyń vitse-prezidenti Marat Esenov pen oblystyq shahmat federatsiiasynyń tóraǵasy, kásipker Anýar Rahimov qatysýshylardy týrnirdiń bastalýymen quttyqtap, olarǵa sáttilik pen jeńis tiledi.
Belgili bolǵandai, biylǵy «Masters» týrnirine 20 grossmeister men 29 halyqaralyq sheber qatysady. Arasynda 2023 jylǵy Qazaqstan kýboginiń iegeri Manýel Petrosian men Aram Akopian (ekeýi de – Armeniiadan), qytailyq Siýi Sianiýi men Bai Tszinshi, irandyq Bardiia Daneshvar, Úndistan sportshysy S.P.Setýraman men Ózbekstan quramasynyń úzdigi, 2022 jylǵy Olimpiada chempiony jáne 2024 jylǵy Olimpiadanyń qola júldegeri Jahongir Vahidov ta bar.
«Oskemen Open» týrniri biylǵy Qazaqstan kýbogi úshin jarystyń ekinshi kezeńi ekenin de aitý kerek. Birinshi kezeń – mamyr aiynyń sońynda Aqtóbede ótse, úshinshi kezeń oiyndary 13-21 qazan aralyǵynda Pavlodarda uiymdastyrylmaq. Kýbok úshin jarystyń qorytyndysy qarasha aiynnyń ortasynda Almatyda nokaýt júiesi boiynsha ótetin finalda belgili bolady.
