Respýblika kóleminde uiymdastyrylatyn sharaǵa balalar men jastardan quralǵan orkestr men ansamblder qatysyp, óner kórsetetini belgili. Óskemende ótken mádeni is-sharaǵa stýdentter de airyqshy úles qosqanyn aita ketýimiz kerek. Mádeni shara jastardyń boiynda buǵynyp jatqan talanttaryn kópshilikke pash etetin kermet múmkindik boldy.
Óskemen qalasynyń ortalyq kóshesinde uiymdastyrylǵan sherýge 5 myń bala qatysqan. Merekelik sherýde daýylpazdar toby, qazaq jáne orys halqynyń mýzykalyq aspaptaryn meńgergen jastar qalany ásem sazǵa bólep, turǵyndarǵa úlken qýanysh syilaǵanyna kýá boldyq. Sonymen qatar túrli-tústi kiingen majoretter, cherlider jáne myń buralǵan bishiler toby da óz ónerlerin kórsetkenin de aita ketýimiz kerek.
Aitýyly shara barysynda sóz alyp, balalarǵa aq tilegin arnaǵan ShQO ákiminiń orynbasary Ásem Núsipova aldaǵy ýaqytta oblys aýmaǵynda balalardyń jazǵy demalystaryn saýyqtyrý lagerlerinde qyzyqty ótkizip, densaýlyqtaryn túzeý úshin barlyq jaǵdai jasalǵanyn alǵa tartty.
Óz kezeginde oblys ákiminiń orynbasary balalarǵa syilyqtar tabstady. Shara barysynda Ásem Núsipova 20 talantty balaǵa qala syrtyndaǵy lagerde demalýy úshin sertifikatty tapsyrdy. Budan ózge áke-sheshesiniń qamqorlyǵynsyz qalǵan jáne az qamtylǵan otbasylardyń balalary, oqý men sportta úlken jetistikke jetken oqýshylar da túrli syilyqtar men sertifikattarǵa ie boldy.
Biyl jazǵy demalysta Shyǵys Qazaqstan oblysyndaǵy 176 244 bala men jasóspirim oblys aýmaǵynda jumys isteitin lagerler men arnaiy alańdarda demalyp, qoǵamǵa paidaly ispen ainalysyp, «Óz jerińdi tany» dep atalytyn oqý-tájiribelik týrǵa qatysyp, jazǵy demalystaryn qyzyqty ótkizedi dep kútilýde.
– Jyl saiyn uiymdastyrylatyn sherý qazir balalar arasynda úlken mańyzǵa ie bolyp keledi. Biz de alańsyz kúlip, máz-mairam bolǵan balalarǵa qarap, ózimizdiń balalyq shaǵymymyzdy eske túsirdik. Biz de jazǵy demalysty asyǵa kútip, largerge barǵansha asyǵýshy edik. Jastarǵa, jalpy óskemendikterge erekshe kóńil-kúi syilaǵan uiymdastyrýshylarǵa alǵys aitamyz, – dedi Óskemen qalasynyń turǵyny Liýdmila Berketova.
1 maýsym – Halyqaralyq balalardy qorǵaý kúni Óskemen qalasynda 80 myńnan astam oqýshy qatysyp, kontsert pen túrli sporttyq sharalar uiymdastyrdy. Balalar asfalt betine túrli sýretter salýdan jaryssa, az qamtylǵan otbasynda tárbielenip jatqan balalar qaladaǵy teatrlardaǵy qoiylymdardy tegin tamashalaýǵa múmkindik aldy. Al áke-sheshesiniń qamqorlyǵynsyz qalǵan jetim balalar qaladaǵy dámhana, kinoteatr men oiyn-saýyq ortalyqtarynyń qyzmetin tegin paidalanyp, tól merekelerin qyzyqty ótkizdi.
