Óskemende «AES Óskemen GES» JShS bazasynda mektep oqýshylary úshin Ashyq esik kúni ótti. Shara ShQO bilim basqarmasy men kásiporynnyń uiymdastyrýymen jumysshy mamandyqtar jylyna orai uiymdastyryldy, - dep habarlaidy Dalanews.kz
Kezdesýge tehnikalyq jáne injenerlik mamandyqtarǵa qyzyǵatyn oqýshylar qatysty.
"Búgingi is-sharany biz politehnikalyq kolledjben birlesip ótkizip otyrmyz. Bizdiń stantsiia Memleket basshysynyń Joldaýynda aitylǵan jumysshy mamandyqtaryn dáripteý mindetin iske asyrýǵa belsendi qatysady. Bes jyldan beri dýaldy oqytý baǵdarlamasyn júzege asyryp kelemiz. Osy baǵdarlamanyń arqasynda kolledj ben ýniversitet túlekteri bizdiń komandaǵa qosylyp, tabysty eńbek etýde", – dedi Úlbi jáne Shúlbi sý elektr stantsiialarynyń bas direktory Tilek Aidabolov.
Oblystyq kásiptik bilim berý ortalyǵy direktorynyń orynbasary Lázzat Kezdikbaeva da bul bastamanyń mańyzdylyǵyn atap ótti.
"2025 jyl Jumysshy mamandyqtar jyly bolyp jariialandy. Osyǵan bailanysty oqýshylarǵa kásiptik baǵdar berý jumystary qarqyndy júrgizilýde. Óńirdegi jetekshi kásiporyndarmen birlesken sharalar arqyly mektep túlekterine mamandyq tańdaýda kómek kórsetilýde. Sondai-aq, jergilikti biýdjetten bólinetin oqý granttary da jyl saiyn artyp keledi", – dedi ol.
Ekskýrsiia barysynda oqýshylar óńirdegi iri energetikalyq nysannyń jumysymen tanysyp, gidroelektrostantsiiada qoldanylatyn zamanaýi tehnologiialar týraly bildi. GES injenerleri men tehnikteri óz mamandyqtary týraly áńgimelep, jabdyqtardy kórsetip, stantsiia jumysynyń negizgi kezeńderin túsindirdi. Sondai-aq, oqýshylar eńbek jolynda tabysqa jetý úshin qajet kásiptik daǵdylar men mańyzdy qasietter týraly suraqtaryna jaýap aldy.
Kezdesý aiasynda qyzyqty kvest-oiyn uiymdastyrylyp, jeńimpazdarǵa óńirdegi kolledjderde beiindik mamandyqtar boiynsha tegin oqý joldamasy tabystaldy. Sonymen qatar, kásiporyn qyzmetkerleri oqýshylarǵa óz eńbek joldaryn aityp, tájiribelerimen bólisti.
№14 mekteptiń oqýshysy Aizada Marhabatqyzy bolashaqta elektr energetikasy salasynyń mamany bolýdy qalaitynyn jetkizdi.
"Búgin biz sý elektr stantsiiasynyń jumysymen tanysyp, osy saladaǵy mamandyqtar týraly qyzyqty aqparat aldyq. Prezidentimiz Qasym-Jomart Toqaev jumysshy mamandyqtarynyń mańyzdylyǵyn atap ótken bolatyn. Men bolashaqta elektr injeneriiasyn meńgergim keledi. Bul salada jumysqa ornalasý múmkindigi joǵary. Barlyǵy oidaǵydai bolsa, keiin Óskemen sý elektr stantsiiasynda eńbek etkim keledi", – dedi ol.
Ashyq esik kúni oqýshylar úshin mańyzdy oqiǵa boldy. Bul shara olardyń jumysshy mamandyqtar álemine enýine jáne injenerlik-tehnikalyq mamandyqtardyń el damýy úshin qanshalyqty mańyzdy ekenin túsinýine múmkindik berdi.
