Memleket basshysy Qasym-Jomart Toqaev jumysshylardyń bedelin arttyrý jáne eńbek naryǵynda suranysqa ie mamandardy daiarlaý maqsatynda 2025 jyldy “Jumysshy mamandyqtary jyly” dep jariialady. Osyǵan orai Óskemende Workshop alańy uiymdastyryldy,- dep habarlaidy Dalanews.kz
Óskemendegi “Mamandyǵym – Maqtanyshym” Workshop alańy mektep oqýshylary, stýdentter, kolledjder, joǵary oqý oryndarynyń ókilderi men oblys kásiporyndarynyń basyn qosqan biregei sharaǵa ainaldy. Iri kompaniialardyń qyzmetimen jáne bilim berý baǵdarlamalarymen syndarly dialog formatynda tanysý ótti.
Búgingi tańda óńirdiń tehnikalyq jáne kásiptik bilim berý júiesinde 101 mamandyq boiynsha kadr daiyndaityn 38 kolledj bar. Aita ketý kerek, dál Shyǵys Qazaqstanda dýaldy bilim berý baǵdarlamasy pilottyq rejimde júzege asyrylýda. Oǵan oblystaǵy 27 kolledj ben 400-den astam kásiporyn qatysyp jatyr.
Baǵdarlamanyń ádettegi oqý úderisinen basty aiyrmashylyǵy – oqý protsesinde alǵan teoriialyq bilimdi praktikada tikelei qoldaný múmkindigi. Sondai-aq 100-250 myń teńgege deiin jalaqy beriledi.
Oblys ákimi Nurymbet Saqtaǵanov atap ótkendei, Shyǵys Qazaqstanda jumysshy mamandyqtar tizimi kadr qajettiligine qarai kóbeietin bolady. Osylaisha, jaqyn arada oblystaǵy kolledjderde “Qurylystaǵy smetalyq esep”, “Logistika”, “Qashyqtan basqarylatyn ushaq júiesi”, “Jańartylatyn energiia kózderi”, “Áýe tasymalyn uiymdastyrý” syndy mamandyqtar boiynsha oqytý bastalady.
Seminar barysynda mektep oqýshylary men abitýrientter oqý sharttarymen jáne jumysqa ornalasý múmkindikterimen tanysty. Bul olardyń bolashaq mamandyǵyn tańdaýǵa zor septigin tigizedi.
"Oqý jylynyń aiaqtalýyna óte az ýaqyt qaldy. Suranysqa ie bolý úshin qandai mamandyq tańdaý kerektigin jaqsylap oilaný kerek. Búgingi tańda jumysshy mamandyqtardyń bedeli joǵary. Olar ekonomikalyq damýdyń negizi sanalady. Barlyǵyńyzǵa ómirde óz oryndaryńyzdy taýyp, sapaly bilim alýda sáttilik tileimin", - dedi Nurymbet Saqtaǵanov.
Aita keteiik, Shyǵys Qazaqstan aýdandarynda kadrlardy daiarlaý jáne qaita daiarlaý kýrstary ashylyp, jumyssyzdarǵa erekshe kóńil bólinedi. Óńirde memlekettik qoldaý belsendi túrde qoldanylyp keledi. Jumys oryndaryn ashatyn jańa kásiporyndar qurylyp jatqandyqtan, mundai kýrstar aýyldyq jerlerde jumyspen qamtýdy qamtamasyz etý úshin múmkindik beredi. “Tamaqtandyrýdy uiymdastyrý”, “Dánekerleý isi”, “Elektr jabdyqtary”, “Esep jáne aýdit” siiaqty mamandyqtar boiynsha bilim alýǵa múmkindik beretin Mobildi oqý ortalyǵy aýyldyq jerlerde de jumysyn jalǵastyrady.
Sonymen qatar aimaq basshysy Nurymbet Saqtaǵanovtyń aitýynsha, Shyǵys Qazaqstan oblysynda jumys istep jatqan mamandardy qoldaý sharalary da júzege asyrylýda. Osylaisha, óńirde kadr máselesin sheshý, jylý energetikasy salasyna bilikti mamandardy tartý jáne oǵan suranysty arttyrý maqsatynda 2024 jyldan bastap alǵash ret “Otbasy bankimen” birlesip “Shyǵys Mamany” jeńildetilgen ipotekalyq baǵdarlamasy pilottyq rejimde iske qosyldy.
