مەملەكەت باسشىسى قاسىم-جومارت توقايەۆ جۇمىسشىلاردىڭ بەدەلىن ارتتىرۋ جانە ەڭبەك نارىعىندا سۇرانىسقا يە مامانداردى دايارلاۋ ماقساتىندا 2025 جىلدى “جۇمىسشى ماماندىقتارى جىلى” دەپ جاريالادى. وسىعان وراي وسكەمەندە Workshop الاڭى ۇيىمداستىرىلدى،- دەپ حابارلايدى Dalanews.kz
وسكەمەندەگى “ماماندىعىم – ماقتانىشىم” Workshop الاڭى مەكتەپ وقۋشىلارى، ستۋدەنتتەر، كوللەدجدەر، جوعارى وقۋ ورىندارىنىڭ وكىلدەرى مەن وبلىس كاسىپورىندارىنىڭ باسىن قوسقان بىرەگەي شاراعا اينالدى. ءىرى كومپانيالاردىڭ قىزمەتىمەن جانە ءبىلىم بەرۋ باعدارلامالارىمەن سىندارلى ديالوگ فورماتىندا تانىسۋ ءوتتى.
بۇگىنگى تاڭدا ءوڭىردىڭ تەحنيكالىق جانە كاسىپتىك ءبىلىم بەرۋ جۇيەسىندە 101 ماماندىق بويىنشا كادر دايىندايتىن 38 كوللەدج بار. ايتا كەتۋ كەرەك، ءدال شىعىس قازاقستاندا دۋالدى ءبىلىم بەرۋ باعدارلاماسى پيلوتتىق رەجيمدە جۇزەگە اسىرىلۋدا. وعان وبلىستاعى 27 كوللەدج بەن 400-دەن استام كاسىپورىن قاتىسىپ جاتىر.
باعدارلامانىڭ ادەتتەگى وقۋ ۇدەرىسىنەن باستى ايىرماشىلىعى – وقۋ پروسەسىندە العان تەوريالىق ءبىلىمدى پراكتيكادا تىكەلەي قولدانۋ مۇمكىندىگى. سونداي-اق 100-250 مىڭ تەڭگەگە دەيىن جالاقى بەرىلەدى.
وبلىس اكىمى نۇرىمبەت ساقتاعانوۆ اتاپ وتكەندەي، شىعىس قازاقستاندا جۇمىسشى ماماندىقتار ءتىزىمى كادر قاجەتتىلىگىنە قاراي كوبەيەتىن بولادى. وسىلايشا، جاقىن ارادا وبلىستاعى كوللەدجدەردە “قۇرىلىستاعى سمەتالىق ەسەپ”، “لوگيستيكا”، “قاشىقتان باسقارىلاتىن ۇشاق جۇيەسى”، “جاڭارتىلاتىن ەنەرگيا كوزدەرى”، “اۋە تاسىمالىن ۇيىمداستىرۋ” سىندى ماماندىقتار بويىنشا وقىتۋ باستالادى.
سەمينار بارىسىندا مەكتەپ وقۋشىلارى مەن ابيتۋريەنتتەر وقۋ شارتتارىمەن جانە جۇمىسقا ورنالاسۋ مۇمكىندىكتەرىمەن تانىستى. بۇل ولاردىڭ بولاشاق ماماندىعىن تاڭداۋعا زور سەپتىگىن تيگىزەدى.
"وقۋ جىلىنىڭ اياقتالۋىنا وتە از ۋاقىت قالدى. سۇرانىسقا يە بولۋ ءۇشىن قانداي ماماندىق تاڭداۋ كەرەكتىگىن جاقسىلاپ ويلانۋ كەرەك. بۇگىنگى تاڭدا جۇمىسشى ماماندىقتاردىڭ بەدەلى جوعارى. ولار ەكونوميكالىق دامۋدىڭ نەگىزى سانالادى. بارلىعىڭىزعا ومىردە ءوز ورىندارىڭىزدى تاۋىپ، ساپالى ءبىلىم الۋدا ساتتىلىك تىلەيمىن"، - دەدى نۇرىمبەت ساقتاعانوۆ.
ايتا كەتەيىك، شىعىس قازاقستان اۋداندارىندا كادرلاردى دايارلاۋ جانە قايتا دايارلاۋ كۋرستارى اشىلىپ، جۇمىسسىزدارعا ەرەكشە كوڭىل بولىنەدى. وڭىردە مەملەكەتتىك قولداۋ بەلسەندى تۇردە قولدانىلىپ كەلەدى. جۇمىس ورىندارىن اشاتىن جاڭا كاسىپورىندار قۇرىلىپ جاتقاندىقتان، مۇنداي كۋرستار اۋىلدىق جەرلەردە جۇمىسپەن قامتۋدى قامتاماسىز ەتۋ ءۇشىن مۇمكىندىك بەرەدى. “تاماقتاندىرۋدى ۇيىمداستىرۋ”، “دانەكەرلەۋ ءىسى”، “ەلەكتر جابدىقتارى”، “ەسەپ جانە اۋديت” سياقتى ماماندىقتار بويىنشا ءبىلىم الۋعا مۇمكىندىك بەرەتىن ءموبيلدى وقۋ ورتالىعى اۋىلدىق جەرلەردە دە جۇمىسىن جالعاستىرادى.
سونىمەن قاتار ايماق باسشىسى نۇرىمبەت ساقتاعانوۆتىڭ ايتۋىنشا، شىعىس قازاقستان وبلىسىندا جۇمىس ىستەپ جاتقان مامانداردى قولداۋ شارالارى دا جۇزەگە اسىرىلۋدا. وسىلايشا، وڭىردە كادر ماسەلەسىن شەشۋ، جىلۋ ەنەرگەتيكاسى سالاسىنا بىلىكتى مامانداردى تارتۋ جانە وعان سۇرانىستى ارتتىرۋ ماقساتىندا 2024 جىلدان باستاپ العاش رەت “وتباسى بانكىمەن” بىرلەسىپ “شىعىس مامانى” جەڭىلدەتىلگەن يپوتەكالىق باعدارلاماسى پيلوتتىق رەجيمدە ىسكە قوسىلدى.
