Óskemende Qazaqstanda buryn-sońdy bolmaǵan formattaǵy erekshe shara – «SHOWMEN FEST 2025» oblystyq festivali ótti. Kreativti indýstriiany damytýǵa baǵyttalǵan festival asabalar men shoý-menderge arnaldy, dep habarlaidy Dalanews.kz
Festival aldynda qatysýshylarǵa belgili event-sarapshylar – kásibi júrgizýshi ári «Mehovaia 8/1» tobynyń solisi Qabdol Tilekov, ázilkeshter Aibat Nikýlin men Daniiar Batyrbaev sheberlik sabaqtaryn ótkizdi.
Uiymdastyrýshylardyń aitýynsha, festivaldiń basty maqsaty – qazirgi toi biznesine tyń serpin berip, júrgizýshilerdiń mádenietin jańa deńgeige kóterý. Festival betashar aitýshylar saiysymen bastaldy. Bul bólimde Abylaihan Baqytuly, Alpys Jaqiianov, Nurjan Qasenov syndy ónerpazdar óz sheberlikterin ortaǵa saldy. Jalpy oblysta 150-ge jýyq asaba men betashar aitýshy tirkelse, baiqaýǵa sonyń ishinen 25-ten astam qatysýshy iriktelip alynǵan.
– Betashar – kelinge tek týystardy tanystyryp qana qoimai, qazaqy tárbieni jetkizetin tereń mazmundy dástúr. Asabalar tek kóńil kóterý emes, tárbielik baǵytta da jumys istei alýy kerek, – deidi qazylar alqasynyń múshesi, ánshi Ádil Turǵanbaev.
Negizgi baiqaýǵa oblystyń ár aýdanynan kelgen 22 asaba qatysyp, úsh saǵat boiy óner kórsetti. Qazylar sheshimimen:
- «Eń úzdik shoý-men» (500 000 teńge) – Zaisannan kelgen Mádi Aitqabylov;
- «Úzdik asaba» – Katonqaraǵailyq Nurjan Qasenov;
- «Úzdik betashar» – Alpys Jaqiianov;
- «Kórermen kózaiymy» – Ridderlik Olga Bahrameeva;
- «Úzdik improvizator» – taǵy bir zaisandyq Maqsat Sadyqbaev atandy.
– Osyndai mańyzdy sharanyń dál Shyǵys Qazaqstanda ótýi – úlken jetistik. Oblys basshylyǵyna jáne mádeniet basqarmasyna alǵysymyz sheksiz, – dedi festival qazylarynyń biri, tanymal júrgizýshi Aibat Nikýlin.
