وسكەمەندە قازاقستاندا بۇرىن-سوڭدى بولماعان فورماتتاعى ەرەكشە شارا – «SHOWMEN FEST 2025» وبلىستىق فەستيۆالى ءوتتى. كرەاتيۆتى يندۋستريانى دامىتۋعا باعىتتالعان فەستيۆال اسابالار مەن شوۋ-مەندەرگە ارنالدى، دەپ حابارلايدى Dalanews.kz
فەستيۆال الدىندا قاتىسۋشىلارعا بەلگىلى event-ساراپشىلار – كاسىبي جۇرگىزۋشى ءارى «مەحوۆايا 8/1» توبىنىڭ ءسوليسى قابدول تىلەكوۆ، ازىلكەشتەر ايبات نيكۋلين مەن دانيار باتىربايەۆ شەبەرلىك ساباقتارىن وتكىزدى.
ۇيىمداستىرۋشىلاردىڭ ايتۋىنشا، فەستيۆالدىڭ باستى ماقساتى – قازىرگى توي بيزنەسىنە تىڭ سەرپىن بەرىپ، جۇرگىزۋشىلەردىڭ مادەنيەتىن جاڭا دەڭگەيگە كوتەرۋ. فەستيۆال بەتاشار ايتۋشىلار سايىسىمەن باستالدى. بۇل بولىمدە ابىلايحان باقىت ۇلى، الپىس جاقيانوۆ، نۇرجان قاسەنوۆ سىندى ونەرپازدار ءوز شەبەرلىكتەرىن ورتاعا سالدى. جالپى وبلىستا 150-گە جۋىق اسابا مەن بەتاشار ايتۋشى تىركەلسە، بايقاۋعا سونىڭ ىشىنەن 25-تەن استام قاتىسۋشى ىرىكتەلىپ الىنعان.
– بەتاشار – كەلىنگە تەك تۋىستاردى تانىستىرىپ قانا قويماي، قازاقى تاربيەنى جەتكىزەتىن تەرەڭ مازمۇندى ءداستۇر. اسابالار تەك كوڭىل كوتەرۋ ەمەس، تاربيەلىك باعىتتا دا جۇمىس ىستەي الۋى كەرەك، – دەيدى قازىلار القاسىنىڭ مۇشەسى، ءانشى ءادىل تۇرعانبايەۆ.
نەگىزگى بايقاۋعا وبلىستىڭ ءار اۋدانىنان كەلگەن 22 اسابا قاتىسىپ، ءۇش ساعات بويى ونەر كورسەتتى. قازىلار شەشىمىمەن:
- «ەڭ ۇزدىك شوۋ-مەن» (500 000 تەڭگە) – زايساننان كەلگەن ءمادي ايتقابىلوۆ؛
- «ۇزدىك اسابا» – كاتونقاراعايلىق نۇرجان قاسەنوۆ؛
- «ۇزدىك بەتاشار» – الپىس جاقيانوۆ؛
- «كورەرمەن كوزايىمى» – ريددەرلىك ولگا باحرامەيەۆا؛
- «ۇزدىك يمپروۆيزاتور» – تاعى ءبىر زايساندىق ماقسات سادىقبايەۆ اتاندى.
– وسىنداي ماڭىزدى شارانىڭ ءدال شىعىس قازاقستاندا ءوتۋى – ۇلكەن جەتىستىك. وبلىس باسشىلىعىنا جانە مادەنيەت باسقارماسىنا العىسىمىز شەكسىز، – دەدى فەستيۆال قازىلارىنىڭ ءبىرى، تانىمال جۇرگىزۋشى ايبات نيكۋلين.
