29 qarashada Tashkentte Ortalyq Aziia basshylarynyń ekinshi konsýltativti kezdesýi ótedi.
Jiynǵa qatysý úshin Qazaqstannyń burynǵy prezidenti Nursultan Nazarbaev 28 qarashada keshkisin Tashkentke bardy.
Tashkent halyqaralyq áýejaiynda Nazarbaevty Ózbekstan premer-ministri Abdýlla Aripov kútip aldy.
Tájikstan prezidenti Emomali Rahmon da Tashkentke bardy.
Birer kún buryn ǵana Túrkimenstan basshysy Gýrbangýly Berdimuhamedov jumys saparymen Ózbekstanǵa baryp, el prezidenti Shavkat Mirziiaevpen kezdesken bolatyn. Ázirge onyń Ortalyq Aziia basshylarynyń jiynyna qatysatyny, ne qatyspaityny belgisiz.
Qyrǵyz prezidenti Sooronbai Jeenbekov te Ózbekstanǵa ushyp bardy. Onyń ózbek prezidentimen ekijaqty kezdesýi josparlanǵan.
2018 jyldyń naýryz aiynda qazaq astanasynda Ortalyq Aziia elderi liderleriniń alǵashqy konsýltativti kezdesýi ótken.
Ekinshi kezdesý biyl naýryz aiynda Tashkentte josparlanǵan edi. Biraq Ózbekstan taraby kezdesýdi kúzge shegerdi.
Bul jiyndy júieli túrde ótkizýge bastama etip kótergen ózbek prezidenti bolǵan.
