Almatyda jeke sektordaǵy órt qaýipsizdigin arttyrý boiynsha júieli jumys jalǵasyp keledi. Búgin Aqbulaq shaǵynaýdanynyń turǵyndaryna jylytý qurylǵysyn durys paidalaný erejesi túsindirilip, úiine gaz jáne kómirtek totyǵynyń taralýyn anyqtaityn datchikter ornatyla bastady, dep habarlaidy Dalanews.kz.
Tótenshe jaǵdailar departamentiniń qyzmetkerleri kún saiyn jeke sektorda profilaktikalyq túsindirý jumystaryn júrgizedi. Ásirese, demalys kúnderi bul sharalar qarqyn ala túsedi, óitkeni turǵyndar úide bolǵan osy kezde kópshilikke qaýipsizdik talaptary aitylyp, qajet bolsa datchikter ornatylady.
– Qys mezgilinde jylytý qurylǵysyn durys paidalanbaý saldarynan órt qaýpi artady. Sol sebepti biz negizgi órt qaýipsizdigi talaptaryn túsindirip, qatty otynmen nemese tabiǵi gazben jumys isteitin jylytý júieleriniń árdaiym jaramdy kúide bolýyn qadaǵalaý qajettigin aitamyz, - dedi Almaty qalasy TJD memlekettik órt baqylaý basqarmasynyń basshysy, azamattyq qorǵaý podpolkovnigi Konstantin Kanin.
Sondai-aq, ol mundai júielerdi qaraýsyz qaldyrýǵa bolmaitynyn, ásirese úide kishkentai balalar bolsa, erekshe saq bolý kerektigin eskertti.
Aqbulaq shaǵynaýdanynda TJD mamandary kezekti aldyn alý sharasyn ótkizip, áli gaz júiesine qosylmaǵan úilerdi aralady. «QazaqGaz Aimaq» AQ kompaniiasynyń qyzmetkerlerimen birlesip, turǵyndarǵa túsindirý jumystary júrgizilip, qaýipsizdik datchikteri ornatylyp jatyr.
– Belgi berýshi qurylǵy úi ishinde gazdyń tarala bastaǵanyn anyqtaidy da, gaz berýdi birden toqtatatyn qaqpaqshaǵa belgi beredi, - dedi qurylǵynyń jumys isteý tetigin túsindirgen gaz kompaniiasynyń apattyq-dispetcherlik qyzmetiniń jetekshi injeneri Sultanbek Baiǵaziev.
Ol sondai-aq, turǵyndar gazdyń taralýyn anyqtaityn datchikterdi ornatý úshin úi ishindegi gaz jabdyǵy qyzmetine júginýge bolatynyn eske saldy.
Bir kúnde mamandar 60 jeke úidi aralap, 10 kómirtek totyǵy datchigin ornatty. Jyl basynan beri MIB, PIK jáne kondominiýmdarmen birlesip 2 771 adam qatysqan 165 jinalys pen kezdesý ótkizildi.
2018 jyldan beri qala jáne aýdan ákimdikteriniń qoldaýymen almatylyqtardyń úiine 1 628 kómirtegi totyǵy datchigi ornatyldy. Qosymsha taǵy 642 qurylǵy satyp alynyp, qala aýdandaryna datchik ornatý jumystary jalǵasady.
Almatynyń eń osal turǵyn aimaqtarynda órt qaýipsizdigin kúsheitý men úidi qajetti datchikpen jabdyqtaý jumystary jalǵasa beredi. Bul órt qaýpin azaityp, turǵyndardyń alańsyz ómir súrýine septigin tigizedi.
