الماتىدا جەكە سەكتورداعى ءورت قاۋىپسىزدىگىن ارتتىرۋ بويىنشا جۇيەلى جۇمىس جالعاسىپ كەلەدى. بۇگىن اقبۇلاق شاعىناۋدانىنىڭ تۇرعىندارىنا جىلىتۋ قۇرىلعىسىن دۇرىس پايدالانۋ ەرەجەسى ءتۇسىندىرىلىپ، ۇيىنە گاز جانە كومىرتەك توتىعىنىڭ تارالۋىن انىقتايتىن داچيكتەر ورناتىلا باستادى، دەپ حابارلايدى Dalanews.kz.

توتەنشە جاعدايلار دەپارتامەنتىنىڭ قىزمەتكەرلەرى كۇن سايىن جەكە سەكتوردا پروفيلاكتيكالىق ءتۇسىندىرۋ جۇمىستارىن جۇرگىزەدى. اسىرەسە، دەمالىس كۇندەرى بۇل شارالار قارقىن الا تۇسەدى، ويتكەنى تۇرعىندار ۇيدە بولعان وسى كەزدە كوپشىلىككە قاۋىپسىزدىك تالاپتارى ايتىلىپ، قاجەت بولسا داچيكتەر ورناتىلادى.

– قىس مەزگىلىندە جىلىتۋ قۇرىلعىسىن دۇرىس پايدالانباۋ سالدارىنان ءورت ءقاۋپى ارتادى. سول سەبەپتى ءبىز نەگىزگى ءورت قاۋىپسىزدىگى تالاپتارىن ءتۇسىندىرىپ، قاتتى وتىنمەن نەمەسە تابيعي گازبەن جۇمىس ىستەيتىن جىلىتۋ جۇيەلەرىنىڭ ءاردايىم جارامدى كۇيدە بولۋىن قاداعالاۋ قاجەتتىگىن ايتامىز، - دەدى الماتى قالاسى تجد مەملەكەتتىك ءورت باقىلاۋ باسقارماسىنىڭ باسشىسى، ازاماتتىق قورعاۋ پودپولكوۆنيگى كونستانتين كانين.

سونداي-اق، ول مۇنداي جۇيەلەردى قاراۋسىز قالدىرۋعا بولمايتىنىن، اسىرەسە ۇيدە كىشكەنتاي بالالار بولسا، ەرەكشە ساق بولۋ كەرەكتىگىن ەسكەرتتى.

اقبۇلاق شاعىناۋدانىندا تجد ماماندارى كەزەكتى الدىن الۋ شاراسىن وتكىزىپ، ءالى گاز جۇيەسىنە قوسىلماعان ۇيلەردى ارالادى. «QazaqGaz Aimaq» اق كومپانياسىنىڭ قىزمەتكەرلەرىمەن بىرلەسىپ، تۇرعىندارعا ءتۇسىندىرۋ جۇمىستارى جۇرگىزىلىپ، قاۋىپسىزدىك داچيكتەرى ورناتىلىپ جاتىر.

– بەلگى بەرۋشى قۇرىلعى ءۇي ىشىندە گازدىڭ تارالا باستاعانىن انىقتايدى دا، گاز بەرۋدى بىردەن توقتاتاتىن قاقپاقشاعا بەلگى بەرەدى، - دەدى قۇرىلعىنىڭ جۇمىس ىستەۋ تەتىگىن تۇسىندىرگەن گاز كومپانياسىنىڭ اپاتتىق-ديسپەچەرلىك قىزمەتىنىڭ جەتەكشى ينجەنەرى سۇلتانبەك بايعازييەۆ.

ول سونداي-اق، تۇرعىندار گازدىڭ تارالۋىن انىقتايتىن داچيكتەردى ورناتۋ ءۇشىن ءۇي ىشىندەگى گاز جابدىعى قىزمەتىنە جۇگىنۋگە بولاتىنىن ەسكە سالدى.

ءبىر كۇندە ماماندار 60 جەكە ءۇيدى ارالاپ، 10 كومىرتەك توتىعى داچيگىن ورناتتى. جىل باسىنان بەرى ميب، پيك جانە كوندومينيۋمدارمەن بىرلەسىپ 2 771 ادام قاتىسقان 165 جينالىس پەن كەزدەسۋ وتكىزىلدى.

2018 جىلدان بەرى قالا جانە اۋدان اكىمدىكتەرىنىڭ قولداۋىمەن الماتىلىقتاردىڭ ۇيىنە 1 628 كومىرتەگى توتىعى داچيگى ورناتىلدى. قوسىمشا تاعى 642 قۇرىلعى ساتىپ الىنىپ، قالا اۋداندارىنا داچيك ورناتۋ جۇمىستارى جالعاسادى.

الماتىنىڭ ەڭ وسال تۇرعىن ايماقتارىندا ءورت قاۋىپسىزدىگىن كۇشەيتۋ مەن ءۇيدى قاجەتتى داچيكپەن جابدىقتاۋ جۇمىستارى جالعاسا بەرەدى. بۇل ءورت ءقاۋپىن ازايتىپ، تۇرعىنداردىڭ الاڭسىز ءومىر سۇرۋىنە سەپتىگىن تيگىزەدى.