Taıaýda Túrkistan oblysynda «shaǵyn ónerkásiptik park» aýmaǵynda 8 zaýyt pen kásiporyn ashylǵanyn Ortalyq komýnıkasıalar qyzmetiniń Túrkistandaǵy kóshpeli baspasóz máslıhatynda Túrkistan oblysynyń ákimi Darhan Satybaldy málimdedi, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Túrkistan oblysynda alǵash ret «Shaǵyn ónerkásiptik park» jobasy júzege asyrylýda.

– Álemdegi ekonomıkasy damyǵan alpaýyt  memleketterdiń tarıhyna qarasańyz, órkenıetke jetý joly óndiristen bastalǵan. Eger biz de salaǵa serpin beretin zamanaýı kásiporyndardy qura alsaq, ekonomıkalyq táýelsizdikti de bekite túsemiz.

Eń bastysy sol zaýyt pen fabrıkada eńbek etetin eldiń sanasy ózgerip, eńsesi tiktelip, otandyq taýar aınalymynyń úlesi artady. Sondyqtan biz oblysta alǵash ret 100 gektar aýmaqta «Shaǵyn ónerkásiptik park» jobasyn ashqanymyzdy erekshe atap ótkim keledi.

Joba aıasynda 308 mlrd. teńge ınvestısıa tartylyp, 151 óndiristik ǵımarat salynady. 6 myńǵa jýyq jańa jumys orny qurylady. Búdjetke jylyna 2 mlrd. teńge salyq túsedi. Qazir 10 nysan salynyp, 8 kásiporyn ashylyp, 712 jumys orny qurylyp úlgerdi, – dedi Darhan Satybaldy.

Atalǵan aýmaqta jańbyrlatyp sýǵarý qondyrǵylaryn shyǵaratyn kásiporyndar ashyldy. Jıhaz, muzdatqysh jáne qurylys zattaryn shyǵaratyn zaýyttar qoldanysqa berildi. Buryn tek shetelden ákelinetin sý únemdeý tehnologıalary búginde Túrkistanda shyǵarylýda.  Óndiristik parkte ashylǵan kompanıalardyń sý únemdeý tehnologıalary elimizdiń ózge óńirlerine de satylyp jatyr.