تاياۋدا تۇركىستان وبلىسىندا «شاعىن ونەركاسىپتىك پارك» اۋماعىندا 8 زاۋىت پەن كاسىپورىن اشىلعانىن ورتالىق كوممۋنيكاسيالار قىزمەتىنىڭ تۇركىستانداعى كوشپەلى باسپا ءسوز ءماسليحاتىندا تۇركىستان وبلىسىنىڭ اكىمى دارحان ساتىبالدى مالىمدەدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

تۇركىستان وبلىسىندا العاش رەت «شاعىن ونەركاسىپتىك پارك» جوباسى جۇزەگە اسىرىلۋدا.

– الەمدەگى ەكونوميكاسى دامىعان الپاۋىت  مەملەكەتتەردىڭ تاريحىنا قاراساڭىز، وركەنيەتكە جەتۋ جولى وندىرىستەن باستالعان. ەگەر ءبىز دە سالاعا سەرپىن بەرەتىن زاماناۋي كاسىپورىنداردى قۇرا الساق، ەكونوميكالىق تاۋەلسىزدىكتى دە بەكىتە تۇسەمىز.

ەڭ باستىسى سول زاۋىت پەن فابريكادا ەڭبەك ەتەتىن ەلدىڭ ساناسى وزگەرىپ، ەڭسەسى تىكتەلىپ، وتاندىق تاۋار اينالىمىنىڭ ۇلەسى ارتادى. سوندىقتان ءبىز وبلىستا العاش رەت 100 گەكتار اۋماقتا «شاعىن ونەركاسىپتىك پارك» جوباسىن اشقانىمىزدى ەرەكشە اتاپ وتكىم كەلەدى.

جوبا اياسىندا 308 ملرد. تەڭگە ينۆەستيسيا تارتىلىپ، 151 وندىرىستىك عيمارات سالىنادى. 6 مىڭعا جۋىق جاڭا جۇمىس ورنى قۇرىلادى. بيۋدجەتكە جىلىنا 2 ملرد. تەڭگە سالىق تۇسەدى. ءقازىر 10 نىسان سالىنىپ، 8 كاسىپورىن اشىلىپ، 712 جۇمىس ورنى قۇرىلىپ ۇلگەردى، – دەدى دارحان ساتىبالدى.

اتالعان اۋماقتا جاڭبىرلاتىپ سۋعارۋ قوندىرعىلارىن شىعاراتىن كاسىپورىندار اشىلدى. جيھاز، مۇزداتقىش جانە قۇرىلىس زاتتارىن شىعاراتىن زاۋىتتار قولدانىسقا بەرىلدى. بۇرىن تەك شەتەلدەن اكەلىنەتىن سۋ ۇنەمدەۋ تەحنولوگيالارى بۇگىندە تۇركىستاندا شىعارىلۋدا.  وندىرىستىك پاركتە اشىلعان كومپانيالاردىڭ سۋ ۇنەمدەۋ تەحنولوگيالارى ەلىمىزدىڭ وزگە وڭىرلەرىنە دە ساتىلىپ جاتىر.