Tanymal ánshi Toqtar Serikov alǵash ret betashar rásimin atqarǵan kezin esine aldy, dep habarlaidy Dalanews.kz.
"HabarLike" baǵdarlamasyna suhbat bergen óner iesi bozbala shaǵynda toilarda bet ashyp, nápaqa tapqanyn atap ótken. Sonymen qatar ol elge tanymal jandardyń ishinde Ainur Tursynbaevanyń betin ashqanyn aitady.
"Men kóp betashar rásimin ótkerdim. Meirambek ekeýmiz qosylyp, dýet bolyp ta ashtyq. Betashar nan tabýdyń eń jaqsy joly edi ǵoi. Ol kezde toi ieleri betashardyń bankisine túsken aqshany ózine almaityn. Birde orystildi otbasynyń betashar toiyna bardym. 12 adamnyń tizimin berdi. Men shyr-pyr boldym, az aqsha túsetin boldy dep. Biraq toi sońynda óte kóp dollarmen ýystap aqsha ustatty. Ol kezde stýdentpin. Bir býma aqshany qaida jaratamyn dep oilanyp kelgenim bar",– dep kúldi ánshi.
Sonymen qatar ánshi pasportyna ainalyp, ózin elge tanytqan “Kórshiniń qyzy” ániniń shyǵý tarihy týraly da baiandady.
“Kórshiniń qyzy” – dýetke jatpaidy, negizi meniń jeke oryndaýymdaǵy án. Bul ánniń oqiǵasy qyzyq. Ol ándi men oryndamaýym kerek bolǵan. Avtor Bekjan Áshirbekov: ”Toqtar, osy ándi oryndashy” dep eń alǵash maǵan alyp kelgen kezde án unamady. Sodan Ulyqpan maǵan “Sen ánniń sózin jaz, ánshilerge kórseteiik, bireý aitatyn shyǵar” dedi. Men kelistim. Sodan soń stýdiianyń ishinde aityp jatqan kezde Beibit kirip keldi de, “la-la-la” dep qosyldy. Men ony “Kel, ekeýmiz birge aitaiyqshy” dep shaqyryp aldym. Osylai aiaq asty bolǵan dúnie. Erteńgisin tań atpai Ulyqpan aǵa qaitadan telefon soǵyp, “Stýdiiaǵa, tez kel” dedi. Birdeńe bolǵan eken dep, stýdiiaǵa júgirip keldim. “Myna ándi sen aitpasań, bolmaidy” dedi. Tyńdasam, ándi óńdegen kezde ádemi bolyp shyǵypty. Sodan aitsam, aitaiynshy dep, birden Bekjanǵa habarlastyq, sol kúni radioǵa berdik. Erteńgisi sol án hit boldy. Beibit “kórshiniń qyzy” atalyp ketti. Birde Shymkentten qaityp kele jatqanda joldan tamaq isheiin dep toqtadyq. Kishkentai balalar meni tanyp qalyp, Beibitti nusqap, “Kórshiniń qyzy otyr qasynda" deidi", – dep eske aldy Toqtar Serikov.
