تانىمال ەنشٸ توقتار سەرٸكوۆ العاش رەت بەتاشار رەسٸمٸن اتقارعان كەزٸن ەسٸنە الدى, دەپ حابارلايدى Dalanews.kz.
"حابارLike" باعدارلاماسىنا سۇحبات بەرگەن ٶنەر يەسٸ بوزبالا شاعىندا تويلاردا بەت اشىپ, نەپاقا تاپقانىن اتاپ ٶتكەن. سونىمەن قاتار ول ەلگە تانىمال جانداردىڭ ٸشٸندە اينۇر تۇرسىنباەۆانىڭ بەتٸن اشقانىن ايتادى.
"مەن كٶپ بەتاشار رەسٸمٸن ٶتكەردٸم. مەيرامبەك ەكەۋمٸز قوسىلىپ, دۋەت بولىپ تا اشتىق. بەتاشار نان تابۋدىڭ ەڭ جاقسى جولى ەدٸ عوي. ول كەزدە توي يەلەرٸ بەتاشاردىڭ بانكٸسٸنە تٷسكەن اقشانى ٶزٸنە المايتىن. بٸردە ورىستٸلدٸ وتباسىنىڭ بەتاشار تويىنا باردىم. 12 ادامنىڭ تٸزٸمٸن بەردٸ. مەن شىر-پىر بولدىم, از اقشا تٷسەتٸن بولدى دەپ. بٸراق توي سوڭىندا ٶتە كٶپ دوللارمەن ۋىستاپ اقشا ۇستاتتى. ول كەزدە ستۋدەنتپٸن. بٸر بۋما اقشانى قايدا جاراتامىن دەپ ويلانىپ كەلگەنٸم بار",– دەپ كٷلدٸ ەنشٸ.
سونىمەن قاتار ەنشٸ پاسپورتىنا اينالىپ, ٶزٸن ەلگە تانىتقان “كٶرشٸنٸڭ قىزى” ەنٸنٸڭ شىعۋ تاريحى تۋرالى دا باياندادى.
“كٶرشٸنٸڭ قىزى” – دۋەتكە جاتپايدى, نەگٸزٸ مەنٸڭ جەكە ورىنداۋىمداعى ەن. بۇل ەننٸڭ وقيعاسى قىزىق. ول ەندٸ مەن ورىنداماۋىم كەرەك بولعان. اۆتور بەكجان ەشٸربەكوۆ: ”توقتار, وسى ەندٸ ورىنداشى” دەپ ەڭ العاش ماعان الىپ كەلگەن كەزدە ەن ۇنامادى. سودان ۇلىقپان ماعان “سەن ەننٸڭ سٶزٸن جاز, ەنشٸلەرگە كٶرسەتەيٸك, بٸرەۋ ايتاتىن شىعار” دەدٸ. مەن كەلٸستٸم. سودان سوڭ ستۋدييانىڭ ٸشٸندە ايتىپ جاتقان كەزدە بەيبٸت كٸرٸپ كەلدٸ دە, “لا-لا-لا” دەپ قوسىلدى. مەن ونى “كەل, ەكەۋمٸز بٸرگە ايتايىقشى” دەپ شاقىرىپ الدىم. وسىلاي اياق استى بولعان دٷنيە. ەرتەڭگٸسٸن تاڭ اتپاي ۇلىقپان اعا قايتادان تەلەفون سوعىپ, “ستۋديياعا, تەز كەل” دەدٸ. بٸردەڭە بولعان ەكەن دەپ, ستۋديياعا جٷگٸرٸپ كەلدٸم. “مىنا ەندٸ سەن ايتپاساڭ, بولمايدى” دەدٸ. تىڭداسام, ەندٸ ٶڭدەگەن كەزدە ەدەمٸ بولىپ شىعىپتى. سودان ايتسام, ايتايىنشى دەپ, بٸردەن بەكجانعا حابارلاستىق, سول كٷنٸ راديوعا بەردٸك. ەرتەڭگٸسٸ سول ەن حيت بولدى. بەيبٸت “كٶرشٸنٸڭ قىزى” اتالىپ كەتتٸ. بٸردە شىمكەنتتەن قايتىپ كەلە جاتقاندا جولدان تاماق ٸشەيٸن دەپ توقتادىق. كٸشكەنتاي بالالار مەنٸ تانىپ قالىپ, بەيبٸتتٸ نۇسقاپ, “كٶرشٸنٸڭ قىزى وتىر قاسىندا" دەيدٸ", – دەپ ەسكە الدى توقتار سەرٸكوۆ.
