Árıne, usaq-túıek maqalaǵa bola bas aýyrtpaıtynyńyz belgili. Biraq biz kótergen másele ultqa, tilge, rýhqa qatysty bolsa jáne ol jandy jerlerińizge tıse, tynysh jata almaısyzdar. Sizder úshin mundaı maqala jazǵan gazetter arandatýshy, al maqalany uıymdastyrǵan avtor ultshyl, ultarazdyqty qozdyrýshy jáne taǵysyn taǵy. Aıtar aıyptaýlaryńyz ben taǵatyn kinálaryńyz kóp.
Sizder jáne bizder eki bólek álembiz. Eshqashan syıyspaıtyn jáne eshqashan túsinispeıtin. Bálkim, solaı berý kerek shyǵar...
Sebebi sizder eshqashan da bizdiń sózimizdi sóılemeısizder, tıisinshe biz de sizder kótergen máseleni eshqashan qoldamaq emespiz. Sonda kimdiki durys? Qalaı oılaısyzdar osy?
Keı keıde sizderdiń pıǵyldaryńyzdan qorqamyz. Atyshýly Taıchıbekov pen odan ótken Shevsova-Valova Táýelsizdikkke, qazaq halqyna til tıgizgende úndemegen sizder, kerisinshe, bulardyń sózin joqqa shyǵaryp, qarsylyq bildirgendi ultshyl dep atadyńyzdar. Solaı emes pe?
Bálkim álgi Taıchıbekovtyń aıtqany sizderge maıdaı jaqqan bolar, kim bilsin. Odan qaldy osy ýaqytqa deıin túrýli irgeden tas atyp, taǵy da sol táýelsizdikke til tıgizgen Jırınovskıı pen Lımonovtar sizderdiń taraptaryńyzdan syn sadaǵyna ilindi me? Bizdiń bilýimizshe, joq. Olardyń ıt terisin basyna qaptaǵan orystildi basylymdardyń maqalalaryn oqyǵan da, kórgen de joqpyz.
Bir bilerimiz, qazaq belsendiligi sizder úshin qaýipti bolǵasyn muny árdaıym jáne árqashan teris jaǵynan kórsetkilerińiz keledi.
Biz til úshin kúressek te, ult úshin pikir bildirsek te jamanbyz. Syltaýlaryńyz daıyn: kópultty Qazaqstanda mundaı máselelerdi kóterýge bolmaıdy.
Qazaqtyń osy ýaqytqa deıin qansha dúnıeni joǵaltqanyn jáne joǵaltqanyn túgendeýge tıis ekenin túsinbeısizder. Sizderge bulaı aıtýdyń ózi aqymaqtyq. Tyńdaı bilmeısizder, sebebi.
Aıtyńyzdarshy, sizder úshin Táýelsizdik merekesi qanshalyqty qadirli? Sizder ony qanshalyqty qamtyp jazdyńyzdar? Orystildi oqyrman 16 Jeltoqsanda alańǵa shyqqan jastardyń ne úshin kúreskenin jáne ne úshin jan tapsyrǵanyn bile me?
Jalpy, táýelsizdik taqyrybyn, onyń maqsaty men mazmunyn sizder qanshalyqty qamtyńyzdar osy? Ol qanshalyqty aıtyldy?
Aıtpaqshy, bıyl Táýelsizdik alǵanymyzǵa 25 jyl. Sizder sony bilesizder me?
Odan qaldy Alashordanyń irgesin qalaǵan Álıhan Bókeıhannyń 150 jyldyǵy? Muny biz ǵana jazýǵa tıispiz be?
Osy ýaqytqa deıin aıtylǵan, jazylǵan dúnıelerdi saraptap qarasaq, sizder bizdiń basqan izimizdi ańdýmen júripsizder.
Qazaq basylymdaryn, qazaq ultshyldaryn kóp ultty Qazaqstanǵa jekkórinishti etip kórsetý sizderdiń arqalaryńyz eken.
Osy ýaqytqa deıin ózderińiz «oralman» deıtin, al biz úshin áldeqashan qandasqa aınalǵan qaýymdy qansha ret kemsitkenderińizdi sanamalap bersek, on saýsaq túgel búgiler edi.
Anyǵynda, qandastardy «daıyn asqa tik qasyq» qylyp kórsetip, olardy saýatsyz, bilimsiz degen, odan qaldy «Qara jorǵany» qazaqtyń ulttyq bıine jatqyzbaı tastaǵan, myna sizder edińizder. Biraq biz úndegen joqpyz.
Sebebi sizderdiń de, bizderdiń de synalatyn shaǵymyz alda.
İrgedegi kórshimizben aradaǵy aqparattyq soǵys áli bastalǵan joq. Biraq bastalǵan jaǵdaıda kim kimniń sózin sóıler eken?..
Al FREDO
