ارينە، ۇساق-تۇيەك ماقالاعا بولا باس اۋىرتپايتىنىڭىز بەلگىلى. ءبىراق ءبىز كوتەرگەن ماسەلە ۇلتقا، تىلگە، رۋحقا قاتىستى بولسا جانە ول جاندى جەرلەرىڭىزگە تيسە، تىنىش جاتا المايسىزدار. سىزدەر ءۇشىن مۇنداي ماقالا جازعان گازەتتەر ارانداتۋشى، ال ماقالانى ۇيىمداستىرعان اۆتور ۇلتشىل، ۇلتارازدىقتى قوزدىرۋشى جانە تاعىسىن تاعى. ايتار ايىپتاۋلارىڭىز بەن تاعاتىن كىنالارىڭىز كوپ.
سىزدەر جانە بىزدەر ەكى بولەك الەمبىز. ەشقاشان سىيىسپايتىن جانە ەشقاشان تۇسىنىسپەيتىن. بالكىم، سولاي بەرۋ كەرەك شىعار...
سەبەبى سىزدەر ەشقاشان دا ءبىزدىڭ ءسوزىمىزدى سويلەمەيسىزدەر، تيىسىنشە ءبىز دە سىزدەر كوتەرگەن ماسەلەنى ەشقاشان قولداماق ەمەسپىز. سوندا كىمدىكى دۇرىس؟ قالاي ويلايسىزدار وسى؟
كەي كەيدە سىزدەردىڭ پيعىلدارىڭىزدان قورقامىز. اتىشۋلى تايچيبەكوۆ پەن ودان وتكەن شيەۆسوۆا-ۆالوۆا تاۋەلسىزدىكككە، قازاق حالقىنا ءتىل تيگىزگەندە ۇندەمەگەن سىزدەر، كەرىسىنشە، بۇلاردىڭ ءسوزىن جوققا شىعارىپ، قارسىلىق بىلدىرگەندى ۇلتشىل دەپ اتادىڭىزدار. سولاي ەمەس پە؟
بالكىم الگى تايچيبەكوۆتىڭ ايتقانى سىزدەرگە مايداي جاققان بولار، كىم ءبىلسىن. ودان قالدى وسى ۋاقىتقا دەيىن ءتۇرۋلى ىرگەدەن تاس اتىپ، تاعى دا سول تاۋەلسىزدىككە ءتىل تيگىزگەن جيرينوۆسكيي پەن ليمونوۆتار سىزدەردىڭ تاراپتارىڭىزدان سىن ساداعىنا ءىلىندى مە؟ ءبىزدىڭ بىلۋىمىزشە، جوق. ولاردىڭ يت تەرىسىن باسىنا قاپتاعان ءورىستىلدى باسىلىمداردىڭ ماقالالارىن وقىعان دا، كورگەن دە جوقپىز.
ءبىر بىلەرىمىز، قازاق بەلسەندىلىگى سىزدەر ءۇشىن ءقاۋىپتى بولعاسىن مۇنى ءاردايىم جانە ءارقاشان تەرىس جاعىنان كورسەتكىلەرىڭىز كەلەدى.
ءبىز ءتىل ءۇشىن كۇرەسسەك تە، ۇلت ءۇشىن پىكىر بىلدىرسەك تە جامانبىز. سىلتاۋلارىڭىز دايىن: كوپۇلتتى قازاقستاندا مۇنداي ماسەلەلەردى كوتەرۋگە بولمايدى.
قازاقتىڭ وسى ۋاقىتقا دەيىن قانشا دۇنيەنى جوعالتقانىن جانە جوعالتقانىن تۇگەندەۋگە ءتيىس ەكەنىن تۇسىنبەيسىزدەر. سىزدەرگە بۇلاي ايتۋدىڭ ءوزى اقىماقتىق. تىڭداي بىلمەيسىزدەر، سەبەبى.
ايتىڭىزدارشى، سىزدەر ءۇشىن تاۋەلسىزدىك مەرەكەسى قانشالىقتى ءقادىرلى؟ سىزدەر ونى قانشالىقتى قامتىپ جازدىڭىزدار؟ ءورىستىلدى وقىرمان 16 جەلتوقساندا الاڭعا شىققان جاستاردىڭ نە ءۇشىن كۇرەسكەنىن جانە نە ءۇشىن جان تاپسىرعانىن بىلە مە؟
جالپى، تاۋەلسىزدىك تاقىرىبىن، ونىڭ ماقساتى مەن مازمۇنىن سىزدەر قانشالىقتى قامتىڭىزدار وسى؟ ول قانشالىقتى ايتىلدى؟
ايتپاقشى، بيىل تاۋەلسىزدىك العانىمىزعا 25 جىل. سىزدەر سونى بىلەسىزدەر مە؟
ودان قالدى الاشوردانىڭ ىرگەسىن قالاعان ءاليحان بوكەيحاننىڭ 150 جىلدىعى؟ مۇنى ءبىز عانا جازۋعا ءتيىسپىز بە؟
وسى ۋاقىتقا دەيىن ايتىلعان، جازىلعان دۇنيەلەردى ساراپتاپ قاراساق، سىزدەر ءبىزدىڭ باسقان ءىزىمىزدى اڭدۋمەن جۇرىپسىزدەر.
قازاق باسىلىمدارىن، قازاق ۇلتششىلدارىن كوپ ۇلتتى قازاقستانعا جەككورىنىشتى ەتىپ كورسەتۋ سىزدەردىڭ ارقالارىڭىز ەكەن.
وسى ۋاقىتقا دەيىن وزدەرىڭىز «ورالمان» دەيتىن، ال ءبىز ءۇشىن الدەقاشان قانداسقا اينالعان قاۋىمدى قانشا رەت كەمسىتكەندەرىڭىزدى سانامالاپ بەرسەك، ون ساۋساق تۇگەل بۇگىلەر ەدى.
انىعىندا، قانداستاردى «دايىن اسقا تىك قاسىق» قىلىپ كورسەتىپ، ولاردى ساۋاتسىز، ءبىلىمسىز دەگەن، ودان قالدى «قارا جورعانى» قازاقتىڭ ۇلتتىق بيىنە جاتقىزباي تاستاعان، مىنا سىزدەر ەدىڭىزدەر. ءبىراق ءبىز ۇندەگەن جوقپىز.
سەبەبى سىزدەردىڭ دە، بىزدەردىڭ دە سىنالاتىن شاعىمىز الدا.
ىرگەدەگى كورشىمىزبەن اراداعى اقپاراتتىق سوعىس ءالى باستالعان جوق. ءبىراق باستالعان جاعدايدا كىم كىمنىڭ ءسوزىن سويلەر ەكەن؟..
ال فرەدو
