«Sen shpionsyń!»
Iá, ol kezde qazaq ádebietiniń qos alybynyń qasynda bolmadyq. Biraq osyndai áńgimeniń bolǵanyn sol kezde «Qazaq ádebietinde» qyzmet etken azamattardyń óz aýzynan estidim. Óz basym olardyń ótirik aitqanyn kórgen emespin.
Iá, sol bir sátte barsha qazaq mańdaiyna basqan qos qalamgerdiń arasynda bir túsinispeýshiliktiń bolǵany anyq.
Osy áńgimeni nege eske alyp otyrmyz? Bul jerde baiaǵyda basylǵan daý-shardyń shoǵyn úrleiin degen nietimiz joq.
Qos alyptyń arasyndaǵy áńgimeden qazaqtyń sanasyna Keńes zamanyndaǵy birin-biri «jansyz sanaý» áreketi myqtap sińip qalǵanyn baiqaýǵa bolady. Ziialylarymyz osylai tartysqanda qarapaiym adam ne demeidi?
Esińizde shyǵar, kezinde Keńes ókimetiniń jandaishaptary Alash arystaryn «Japoniianyń tyńshysy», «bir túnde Japoniiaǵa atpen baryp kelip otyrǵan» degen áńgimege ańqaý qazaq sendi ǵoi.
Elimiz táýlesizdigin alǵanyna 25 jyl tolyp, Keńes ókimetiniń qursaýynan bosap shyqsaq ta sol bir ámirshil júieniń oi-sanamyzǵa sińgen ozbyr áreketi áli kómeskilenbepti.
«Atajurt» vs «Jebeý»
Dál qazir Qytaidan kelgen qandastarymyz ekige bólinip, biri «Qytaidyń tyńshysy» bolsa, endi biri «biliktiń quiyrshyǵy» bolyp bólinýde.
Serikjan Biláshuly bastaǵan «Atajurt» eriktileri men «Jebeý» qorynyń jetekshisi Omaraly Ádilbekulynyń mańaiyna toptasqan azamattar áleýmettik jeli arqyly jii tistesip júrgenin kórip júrmiz.
Tipti, bul daý bilikti qorǵaýshy Abzal Quspanov pen qoǵamdyq belsendi Sáýle Ábildahanqyzyn da sharpyp ótkeni belgili.
Árine, erkin oily qoǵamda ár tarap óz oi-pikirin ortaǵa salyp, jumys isteýine qaqysy bar. Bul jerde bizder Qytaidaǵy qazaqtardyń múddesin qorǵap jumys istep jatqan belsendi qandas baýyrlarymyzdyń biri jaqtap, ekinshisin dattaiyn degen oiymyz joq.
Bizdi daýlasqan taraptardyń birin-biri «Qytaidyń shpiony» dep aiyptaǵany tańqaldyrdy. Budan búgingi Qytai biliginiń keshegi keńestik júieden esh aiyrmasy joq ekenin ańǵardyq.
Olar da jurtty úreide ustap, halyqty talai ret qýǵyn-súrginge salǵanyn belgili. Sondyqtan qyzyl imperiianyń qursaýynan qutylý úshin Qytaiǵa qashqan qazaqtardyń ol jaqta mamyrajai kúi keshpegenin birin-biri «Qytaidyń shpiony» dep aiyptaǵanynan anyq ańǵarýǵa bolady.
Nurlan Jumahan, jýrnalist, bloger.
