Batys Qazaqstan oblysy ákimdigi oraldyq muǵalim Ainur Sabyrǵa qarsy aryzyn keri qaitardy. Buǵan deiin oblys basshylyǵy muǵalimge sý tasqyny kezinde áleýmettik kómek retinde berilgen úiin tartyp almaq bolǵan edi. Máseleniń mán-jaiyn Ainur Sabyr Dalanews.kz redaktsiiasyna baiandady.
Muǵalimniń aitýynsha, kúni keshe ákimdik aryzyn keri qaitaryp, sot tyńdaýy bolmaityny týraly habarlaǵan.
“Aryz qazan aiynyń sońynda keldi. Úndeýimdi kópshilikke jariialamas buryn ony qabyldai almadym. Sol kezde ne bolǵanyn túsinbei, meń-zeń kúige tústim. “Nelikten meniń ústimnen aryz berildi? Nege bulai boldy?” degen oilar mazalady. Sený qiyn boldy”, – deidi Ainur Sabyr.
Muǵalim buǵan deiin sottyń tek úsh daiyndyq rásimi bolǵanyn jáne ol barlyǵyna qatysqanyn atap ótti. Alaida naqty sot tyńdaýy bolmaǵan.
“Jaǵdai tolyq sheshildi dep aita almaimyn. Degenmen oń sheshim tabady degen úmit bar. Sebebi meniń esh kinám joq jáne ózime taǵylǵan aiypqa kelispeimin”, – deidi ol.
Muǵalim tasqyn kezinde qalalyq ákimdiktiń halyqqa kórsetken kómegin de joǵary baǵalady.
“Áleýmettik jelidegi jazbalarymda atap ótkenimdei, qalada sý tasqyny kezinde jaqsy ári tiimdi jumystar júrgizildi. Qalalyq ákimdik halyqtyń ál-aýqatyn jaqsartýǵa bar kúshin saldy. Shyn máninde, ár jaqtan aryz túsip, halyq sasyp qalǵan jaǵdaida, jergilikti ákimdikterden kómek surady. Sol ýaqytta men de zardap shekkenderdiń qatarynda bolyp, áleýmettik kómek aldym”, – dedi Ainur Sabyr.
Ádiletsizdikpen kúreste eń qiyn nárse – ózińniń ádil ekenińdi dáleldeý, deidi muǵalim.
“Osy synaq kezinde ainalamda jaqsy adamdar bar ekenine kózim jetti. Áleýmettik jelide tanystarym, belsendi pedagogter men dostarym qoldaý kórsetti. Olar meniń ádiletsiz jaǵdaiǵa tap bolǵanyma alańdap, únemi habarlasyp, máseleniń sheshilýine kómektesti”, – dep qosty ol.
Muǵalim aqparattyq qoldaýdyń mańyzdylyǵyna da toqtaldy.
“Meniń úndeýim qoǵamda úlken rezonans týdyrdy. Onyń úkimetke jetýine qarapaiym azamattardyń qoldaýy sebep boldy. Aqparattyq qoldaýdyń kúshi zor eken. Dalanews.kz jáne basqa saittardyń redaktorlary, jergilikti jýrnalister habarlasyp, máselemdi jan-jaqty jetkizdi. Keibiri baǵdarlama ázirlep jatqanyn aitty. Oqý-aǵartý ministrliginen de jaǵdaiymdy bilip, qoldaý kórsetken adamdar boldy”, – dep qosty ol.
Ainur Sabyr bul jaǵdaidyń kópshilikke sabaq bolatynyna senimdi.
“Aldaǵy ýaqytta men siiaqty zardap shekkenderge qaýip tónbeitin shyǵar. Sebebi halyqtyń únin eskerip, arnaiy komissiialar jaǵdaidy baqylap, kórip otyrdy. Sondyqtan bul is boiynsha jańa aqaý týmaidy dep oilaimyn”, – dedi Ainur Sabyr.
Buǵan deiingi jaǵdai
Aita keteiik, buǵan deiin Oral qalasynyń turǵyny ári muǵalim Ainur Sabyr BQO ákimi Nariman Tóreǵaliulynyń áreketine shaǵymdanyp, Prezidentke, Úkimetke jáne Parlament depýtattaryna ashyq úndeý joldaǵan edi. Ol byltyrǵy sý tasqyny kezinde berilgen jańa úidi oblys basshylyǵy “zańsyz berilgen” degen jeleýmen sot arqyly tartyp almaq bolyp jatqanyn málimdedi.
"2024 jyly Oral qalasyn sý basqan kezde asa iri kólemde zardap shektim. Oral qalasy aýmaǵynda ornalasqan, ishine gaz, jaryq, sý tartylǵan úlken qysqy úiim sýǵa ketip, bir ai boiy sý astynda turdy.
QR Prezidenti Q.K. Toqaevtyń “Sý tasqynynan zardap shekkender úisiz qalmasyn” degen tapsyrmasyna orai, Oral qalasy ákimdigi 2024 jyly jaramsyz úidiń ornyna úi berip, shyǵyndarymyzdy ótegen bolatyn”, - dedi ol.
Onyń aitýynsha, barlyq tekserýden ótken qujattar komissiia tarapynan rastalyp, mamandar úidi “turýǵa jaramsyz” dep tanyǵan. Osylaisha arnaiy komissiialar “úi berilsin” degen sheshim shyǵarǵan.
“Alaida bir jyldan keiin Batys Qazaqstan oblysynyń ákimi Nariman Tóreǵaliuly turǵyndardy sotqa berip, Oral qalasy ákimdigi bergen úidi zańsyz dep tanýdy surap otyr”, - dep qosty ol.
Sózinshe, tótenshe jaǵdaidan zardap shekkenderge Prezidenttiń tapsyrmasymen elimizdiń kásipkerleri kómektesken.
“Maǵan da qala ákimdigine sýǵa ketýden zardap shekken turǵyndarǵa demeýshilikpen “Alageum” zaýyty alyp bergen úilerdiń biri berildi. Úidiń kiltin zaýyt direktory Dúren myrza ulym ekeýimizge óz qolymen tabystaǵan bolatyn”, — dedi ol.
Ainur Sabyrdyń sózinshe, BQO ákimi Nariman Tóreǵaliev bul úilerdi “zańsyz berilgen” dep tanytpaq.
“Endi zardaptyń qara bulty seiilip, bastan ótken aýyr jaǵdaidy umyta bastasaq, oblys ákimi óz turǵyndaryna ozbyrlyq kórsetip, tisin batyryp otyr”, - deidi ol.
Ákimdik jaýaby
Atalǵan jaǵdaidan soń Batys Qazaqstan oblysy ákimdigi Dalanews.kz redaktsiiasyna túsinikteme berdi.
“BQO boiynsha ekonomikalyq tergep-tekserý departamenti júrgizgen taldaý nátijeleri boiynsha Oral qalasy ákimdigi janyndaǵy komissiianyń jekelegen músheleri tarapynan BQO aýmaǵyndaǵy sý tasqyny saldaryn joiý kezeńinde saiajai alaptary turǵyndaryna turǵyn úi bólý jáne keltirilgen zalaldy óteý barysynda zańǵa qaishy áreketter jasalǵany anyqtaldy. Taldaý materialdary komissiia jumysyn zańnamaǵa sáikestendirý boiynsha tiisti sharalar qabyldaý maqsatynda oblys ákimine joldandy”, — dedi BQO ákimdiginiń baspasóz qyzmeti.
Ákimdik qazirgi ýaqytta tek sot arqyly máseleniń túpkilikti sheshiletinin jáne zańǵa sáikes áreket etip jatqanyn jetkizdi.
“Kelip túsken taldaý materialyn jan-jaqty qarap, zańdy sheshim qabyldaý úshin komissiia quramynda bolǵan eki adamǵa qatysty sotqa talap-aryz berildi. Bul másele boiynsha baǵa berý jáne sheshim shyǵarý sottyń quziretine jatady.
Bul rette, atalǵan jaǵdaiǵa túpkilikti baǵa berýge quzyretti organ - tek sot, al faktilerdi burmalap, qoǵamda jalǵan túsinik qalyptastyratyn kez kelgen jariia málimdemeler sot tóreligine qysym jasaý áreketi retinde qarastyrylýy múmkin”, — dedi olar.
