Oraldyq dáriger ákimdik áreketin zańsyz dep tanyp, memlekettik qordan páter berýin talap etti, dep habarlaidy Dalanews.kz.
Sot áieldiń 33 jyldan astam dáriger bolyp jumys istegenin jáne jeke baspanasynyń joqtyǵyn anyqtady. Sońǵy 15 jyl boiy ol qazir jaldaý merzimi bitken jaldamaly páterde turyp kelgen.
Buǵan deiin turǵyn úi komissiiasynyń sheshimimen dárigerge memlekettik qordan qyzmettik páter bólingen. Alaida búgingi kúnge deiin komissiia sheshimi oryndalmaǵan.
Sot otyrysy barysynda taraptar kelisimge keldi. Ákimdik áielge 2024 jyldyń 31 jeltoqsanyna deiin bir nemese eki bólmeli páter berýge mindetteldi.
Bul sheshim oryndalmasa, sot ákimdikke 50 AEK nemese 184 600 teńge kóleminde aiyppul salýy múmkin.
Aita keteiik, buǵan deiin Batys Qazaqstan oblysynda emhanada janjal shyǵarǵan turǵynǵa aiyppul salynǵa edi. Bul týraly jergilikti “Moi gorod” basylymy jazdy. Ákimshilik quqyq buzýshylyq týraly is Báiterek aýdanynyń №2 aýdandyq sotynda qaraldy. Turǵynǵa QR ÁQBtK 80-1-babynyń 2-bóligi boiynsha aiyp taǵyldy.
Oqiǵa 24 qyrkúiek kúni Asan kentindegi emhana ǵimaratynda oryn alǵan. BQO sotynyń málimetinshe, áiel dárigerge qatysty ádepsiz minez kórsetip, ústeldi uryp, aiqailaǵan. Meditsinalyq qyzmetkerdiń kásibi jumysyna kedergi keltirgen turǵyn dárigerge qurmetsizdik tanytqan.
Sotta áieldiń ózi kinásin moiyndaǵan joq jáne ákimshilik quqyq buzýshylyq týraly hattamamen kelispeitinin aitty.
“Osy ýaqytta dáriger dálizge shyǵyp, qasynda otyrǵan qarttarǵa jaryqtyń sóngenin eskertip, anyqtama alý úshin kelgenderdiń kútpeýin ótingen. Aiyptalýshy áiel dárigerden qyzyn tekserýdi suraǵan, al dáriger sol sátte oǵan nazar aýdarmaǵan. Sol jerde turǵan bir ájei kezeksiz kirip ketken. Al dáriger maska taǵyp, burylyp, aiyptalýshyǵa qaramai ketken. Osy kezde ol daýysyn kóterip, dárigerge aiqailady, dárigerdiń ústelin urdy, biraq balaǵat sózder aitpady”, - delingen sot habarlamasynda.
Sot sheshimimen áiel kináli dep tanyldy. Oǵan 110 760 teńge aiyppul salyndy.
