QR Memlekettik rámizderi kúni Oral qalasynda 150 páterlik turǵyn úi paidalanýǵa berildi. Onyń 104 páteri «Otbasy bank» AQ arqyly Turǵyn-úi kommýnaldyq infraqurylymdy damytýdyń 2023-2029 jyldarǵa arnalǵan tujyrymdamasy aiasynda baspanaǵa muqtaj retinde kezekte turǵan áleýmettik osal toptaǵylar, kópbalaly januialar, memlekettik qyzmetshiler, áskeriler jáne ózge de sanattaǵy otbasylarǵa tabystaldy, dep habarlaidy dalanews.kz.
Jańa qonys ielerin oblys ákimi Nariman Tóreǵaliev quttyqtady.
- Memleket basshysy Qasym-Jomart Kemeluly Toqaevtyń tikelei tapsyrmasymen óńirimizde turǵyn úi qurylysy qarqyn aldy. Sonyń ishinde «Aqjaiyq» shaǵynaýdanynyń áleýeti zor. Munda injenerlik jelilerdi tarttyq, jol saldyq. Oral qalasynyń ortalyǵyna qatynasty jeńildetý úshin kópir salýdy qolǵa aldyq. Keleshekte 1500 oryndyq mektep, balabaqsha, aýrýhana, sport keshenin salamyz. Bul — qur ýáde emes, júieli josparǵa sai atqarylyp jatqan naqty ister. Basty maqsat — halyqtyń ómir súrý sapasyn arttyrý, - dedi aimaq basshysy.
Oblys ákimi jańa qonys ielerin Memlekettik rámizder kúnimen de quttyqtap, osyndai igilikti sharalar jas urpaqtyń boiynda otansúigishtik sezimdi arttyryp, sapaly bilim alyp, adal eńbek etýge qanattandyratynyna senim bildirdi.
Aita keteiik, Oral qalasynda 27 myń adam turǵyn úi kezeginde tur. Olardy baspanamen qamtý baǵytynda biyl 1800 páterlik 20 kópqabatty turǵyn úi salý josparlandy.
